Parliament tiptema agitsüla

– P Tiamongba Aier.

Linük asoshi kanga dang tongtipang mapang ka nung Hokolbar nungi Parliament nung Budget Session tenzükogo. Centre-i küm aika rongsenkettsüng tsütsü mapa junga meinyakteti aruba sülen nübortemi tan Budget Session nungbo rongsenkettsüng jenjang shia arudaktsütsü atema sentongtem benoktsü akok ta teimla tulu lir. Ajisüaka, tesüiba mapangtem ama tan Budget session yaa tiptema magiteti tembangtsü asü ta bilemer, kechiyong Hokolbarnü Opposition party aikati Farm Laws agienang ta takhangba agüja lungkak ait tenzükogo. Maneni, Opposition party 20 temai India Tir Ram Nath Kovind-i Parliament nung o jembiba mokdanga liasü. Iba jagi Parliament session tenzükba anogo nung yamai sayuba ajanga session agiyonga aodang sorkar aser opposition tsüngda mepetmesü aser mangatettep tuluba adoktsü amai bilemer. Sorkar aser opposition tsüngda tekong merangtepdang, külem telemtetba tajungtem kecha magiteti, sorkari molungba ama dang telemtetbatem agia, taruba financial year nungji linük nung rongsenkettsüng jenjang tamajungba akümtsü asü ta shisabulur. Alima ajungalen Covid wara ajanga rongsenkettsüng timtem tulu bentsür aruogo aser iba khuret yagi India nunga kanga mejungi kongshiogo. Anungji shitakba agibo tang ya India nung political party ajak tangatettep nung linük rongsenkettsüng jenjang ajungkettsü aser shia arudaktsütsü atema shisatsü lemsatepa telemtetba tajungtem agitsü mapang ka lir. Yaküm Parliament Monsoon Session nung Centre sorkari Farm Laws asem yangluba ajanga tanü linük nung khuret tulu ka ajurua lir. Anungji, Centre-i iba nungi angazüker, opposition teloktemi ashiba angaa, ajak ajungtsü atema telemtetbatem agitsüla. Yaküm Opposition-ibo Farm bill temji parliamentary committee ka nem agüja mapa reprangdaktsütsü shidanga liasü saka Centre-i magizük. Külen, Hokolbarnü opposition teloktemi Tir Ram Nath-i o jembiba mokdangbaji tim masü aser yimya tamajung lir. Party mesüra party temi langka nung jashir mesüra obang meputep adoker Parliament session nung medeni lungkak aitba ajanga tajangzük kecha mangur. Yaküm opposition-i sorkar dang jashiba agi senden nung maden aser iba jagi sorkari zübazüba dang farm bill tem agizüka ozüng aküm aser tanü ibaji ajanga linük yimtiba Delhi nung aluyimertemi ozüng alema mapa inyaktsüsa tensa ka ajuruogo. Iba lendong ajanga senden nung medeni lungkak aitba nung tajangzük kecha maliba jangjajangja sayur. Kasa mapang nung, Centre-ia opposition tebilemba magizüki ozüng yangluba ajanga tarutsü nung tetsükdaktsü ajurur ta asüba iba tatalokba ajanga sayur. Hokolbar, January 29, 2021 nungi Budget Session tenzükba ya February 15 aser March 8 tsüngda sodi agiba sülen April 8 nung ang tembangtsü. Iba session nung taruba financial year atema Union Budget benokba den külemi tongtipang bill aika benoktsü lir, anungji Centre aser opposition telok ajaki nübortem asoshi tebilemtsü khuret bena, tesüiba mapangtem ama mesüi tiptema agiyonga aotsü merangtsüla. Farm laws atema linük ajunga anokshitsüsa tensa ajuruba nungi angazüker, Parliament nung party ajaki olemtepba nung shilem agia vote enoktsüteper ang tatembang telemtetbatem agitsüla. Linük nung sensotemi Parliament agiba nung tamang akatsü atema aser linük rongsenkettsüng jenjang kanga mejungi aliba shia arudaktsütsü atema party ajaki akokba tashi iba Budget Session nung shilem agitsüla.