Parliamentary Committee-i ano RBI Governor Urjit Patel jaoktsü

New Delhi, March 23 (Agencies): Reserve Bank of India (RBI) Governor, Urjit Patel dang demonetization sülen sen tejen kwi bank nung deposit asü’ar asüngdangtsü atema Parliamentary committee kati pa jaoktsü lemtetogo.
Taoba mapang cabinet minister, M Veerappa Moily leniba nung Standing Committees on Finance senden amendang RBI Governor April 20, 2017 nü jaoktsü lemtet, ta osang ka ajanga metetdaktsü.
Patel dak alia Economic Affairs Secretary, Sashikanta Das aser Financial Services Secretary, Anjuly Chib Duggal na danga kasa anogo nung Committee matsüngdangi arutsü metetdaktsüogo.
India nunger sen 500 aser 1,000 notes anentsüba onük nung January 18, 2017 nüa kasa luden senden mena liasü.
January ita senden nung Urjit Patel-i Parliament standing committee on finance dang, 2016 küm tetenzüklen nungi demonesitation onük atema central bank aser sorkar den jembia arua liasü, ta metetdakja liasü.
Patel-isa, demonesatation sülen sen notes tasen lakh crore 9.2 lakh lemzükja amshidar, ta metetdakja liasü.
RBI-i parnok nem agütsüba kija tashi mamshir, saka Centre sorkari tuyubatem angar ta RBI mejungi aitsüdar, iba den külemi opposition-i, Patel-i pa menden nungi alutsüla ta takhangba agüja liasü.
April 20 nü sendenji tatembangbuba senden asütsüa akok, iba sülenjibo parnoki tatembangbuba report renemtsü, ta kasa osang ajanga ashi.
April 20 nüji Patel-i senden jagi marura ano senden ka ayongtsüa akok.
Züngsem 31 aliba Standing Committee on Finance nung taoba mapang Ato kilonser, Manmohan Singh-a züngsem lir. Committee nungsa BJP nungi Nishikant Dubey aser Kirit Somaiya na, Samajwadi Party nungi Naresh Agarwal, Trinamool Congress nungi Dinesh Trivedi aser BSP nungi Satish Chandra Misra nungera densema lir.