Parliamentary luden balala nung MP 95-i senden ka nunga maden

New Delhi, March 02 (Agencies): Parliamentary standing committee balala nung MP 95-ibo Union Budget 2020-21 atema ministry balala asoshi senotsü lemzüktsüba den sendakba senden ka nung danga maden, ta Hombarnü Rajya Sabha Chairman, Venkaiah Naidu-i metetdaktsü.
Parliamentary standing committee balala nung Lok Sabha aser Rajya Sabha naprongla nungi züngsem 244 bo department 24 dak sendakba committee nung lir aser parnok rongnungi züngsem 95-ibo senden ka nung danga maden.
Rajya Sabha tanabuba session tenzükba anogo (March 2) nung Naidu-i, “Züngsem 244 nungi shilem 39- züngsem 95-ibo Demands for Grants senden ka nung danga maden. Züngsem 28-i dang senden ajak nung denogo,” ta metetdaktsü.
“Ni party balala nungi lenirtem, House nung lenirtem aser züngsemtem dang tarutsü nungbo Parliamentary Committees senden nung adentsü mepishir, kechiyong parnok iba atemaji shim,” ta pai metetdaktsü.
Naidu-isa, “Department 24 dak sendakba parliamentary standing committees nung committee 8 bo Rajya Sabha den sendaktepa lir, aser budget session ana tsüngda senden 20 nung adenertemji shilem 45.35 dang liasü. Iba atemji ni mepelar. Item committee 8 nungi committee pezü nungbo attendance shilem 50 liasü, aser iba temaitsüji junger. Attendance tajungtibaji Committee on Health & Family Welfare nung shilem 65.51 liasü. Iba committee nung züngsem 29 nungi züngsem 19 bo senden ajak nung denogo. Attendance tamajungtibaji Committee on Commerce nung shilem 32.25 liasü,” ta metetdaktsü.