Parliamentary ludeni Lokpal report renemogo

New Delhi, November 29 (Agencies): Lokpal Bill reprangba Parliamentary Committee-i küm ka shi ochimashi-anemba bill nung o lemtepa aruba sülen iba draft report renemogo aser tatemsa taruba ita tetenzüklen Rajya Sabha ket nung agütsütsü, ta osang ka ajanga ashi.
Congress MP, E M Sudarsana Natchiappan lenisüba nung züngsem 31 adenba Parliamentary Standing Committee on Personnel, Public Grievances, Law & Justice-i Lokpal, Lokayuktas aser Other Related Law (Amendment) Bill, 2014 reprangshir.
Osangbenertem den jembidang Natchiappan-i, “Draft report ka renema lir aser ibaji Committee züngsem ajak nem lemtsütsü. Parnok tebilemba angadangba sülen tatemsa report ji December 10 matongdang Rajya Sabha nem agütsütsü,” ta ashi.
Pai ashiba agi, committee-i stakeholder tem aser civil servants tebilembatem nung ajemdaker iba bill nung ozüngtem ajak reprangshiogo.
Amendment bill ya yaküm December 18 nü Lok Sabha nung benokba sülen December 22 nü iba Committee nem agüja liasü. Committee dang parnok report ji taküm March 25 tashi nungbosa agüjang ta metetdakja liasü.
Report agütsütsü mapangji July 30 tashi atsülangshi, aser tesülen anaben tashi mapang tali meshisema Sept. 30 tashi khen aser November 15 nü khen ta mapang atsülangshia liasü.
Iba committee-i parnok report ji Rajya Sabha Mendenbuba, Hamid Ansari nem agütsütsü.
Lokpal Act, 2013 ajanga Union nung ochimashi anema watchdog Lokpal tentettsü aser state tem nung Lokayuktas amenoktsü latettsür, koba ajanga ochimashir sorkar ketdangsertem anema ochimashiba ken o benoktsü.
Lokpal selection committee nung Ato kilonser lenisüba kübok züngsemtemji Lok Sabha Speaker, Lower House Opposition Lenir, Chief Justice mesüra pai shimba Supreme Court nungi obendanger ka, Tir-i shimba mesüra züngsem kari shimba jurist ka densema lir.