Parliamentary Secy., Jacob-i ASFMIP lapoktsü

Dimapur, June 02 (TYO): June 1, 2016 nü State Seed Farm, Merapani nung AIBP kübok sen lakh 449.995 shi intoka yangluba Agri Seed Farm Minor Irrigation Project (ASFMIP) Parliamentary Secretary I&FC, N. Jacob Zhimomi-i lapoktsüogo.
Iba sentong nung tongti tesemdanger o jembidang Parliamentary Secretary-i, mapang talangka nungi nüngdaka aliba project nung ali tasazük hectare 300 ya aluyimertem yaritsü, nungittsü aser tajungtiba nung amshitettsü atema lir, kechiyong tzü medeni aluyimba nung tajangzük jenti angutsü makok, ta ashi.
“Nüburtem aser state rongsenkettsüng jenjang tajungba akumtsü atema Irrigation, Agri aser allied department longjemer inyaktsü nüngdak,” ta pai ashi.
DIFCN-i maneni nüngdakba technical teyari agütsütsü, ta pai metetdaktsü.
Pai Agri department dang ibaji junga acha ayangtsüla aser nüburtem atema junga amshidaktsüner, ta mepishi.
Iba project atangji nung ataloktsü atema nendaka inyakba atema pai Chief Minister T.R. Zeliang aser iba tesem MLA, Mhonlumo Kikon na danga pelaba olen shisem.
Kasa sentong nung Agri Dept. Director, Dziesetuo Suokhrie-ia, “tesüiba mapangtem nung tzünglu junga maruba aser tzümetsüng ajanga aluyimertemi timtem ajangshibatem iba project ajanga koktettsü aser Oil seeds, Cereals aser Paddy densema aonsotsü balala metsüngjang tajungba adokdaktsütettsü,” ta ashi.
Iba sentong nung department nungi ketdangser ana den HOD tem, Arogo lenirtem, nüburtem, aluyimertem aser ADC, Orenthung Odyuo-i anir Bhandari ketdangsertema aika densema liasü.
IFCD Chief Engineer, Er. Njilo Kemp lenisüba nung iba sentong agi aser Merapani Pastor, Elis Odyuo-i meshiteta sarasadema iba sentong tenzüka liasü.