Parliamentary Standing Committee-i telungpurtem yaritsü tuyur

Shillong, Luroi (August) 15 (Agencies): Meghalaya nung security tensa dak rangloker Parliamentary Standing Committee on Home Affairs-i Centre aser state sorkartem dang temai adokba telungpurtem nem mapang shitak nung teyari agütsütsü aser parnok tanaben melongjemdaktsütsü atema noktangang ta tetuyuba agütsü.
Temai adokba telungpurtem nem mapang shitak nung teyari magütsüra parnok temulung mesüi ano telungpur telok tasen tentettsü akok mesüra ozüng alema mapa inyaktsü, ta Committee-i ashi.
Security force-i Garo National Liberation Army (GNLA) azüoktetogo aser GNLA züngsem teimba ka temai adokogo mesüra puogo. Meghalaya nung GNLA ya security tsütsü lendong keta lir aser security force temi mapa tajung inyakba atema tenüngsang agütsür, ta Committee-i metetdaktsü.
Ministry of Home Affairs (MHA)-i temai adokba telungpurtem yaritsü atema nendaka mapa inyaktsüla. Parnok nem senotsü teyari den maongkatem agütsütsüla, parnok tanaben telungpur mapa meinyakdaktsütsü atema yaritsüla, ta Committee-isa ashi.
Garo Hills Region nung security forces peria mapa lemzüktsütsüla aser tanüngba GNLA züngsemtem azüoktsü atema combing operations inyaktsüla. Parnok ket nung aliba prangpong injang ajak aputsü atema mapa inyaktsüla, ta Parliamentary Standing Committee on Home Affairs-isa metetdaktsü.
2016 küm Meghalaya kübok Garo Hills tesemtem nung Garo National Liberation Army (GNLA) and Achik Songna Anpachakgipa Kotok (ASAK) teloktemi mapa inyakba ajanga security tensa mejungi aküm. Parnoki Garo Hills kübok district pungu den West Khasi Hills district tesem kar nung mapa inyak.