Parrikar-i Agusta Westland indang sangdong agütsütsü

Panaji, May 01 (Agencies): Tanü Union Defence Minister, Manohar Parrikar-i,  AgustaWestland helicopter aliba indang osang tejangja pai May 4 nü Parliament nung metetdaktsütsü, ta ashi.
Goa yimtiba, Panaji nung football ground yanglutsü atema lung azüngtsüba sentong ka tembangba sülen osangbenertem den jembidang Parrikar-i, “Helicopter alitsü tezüngzüktep agiba indang ni Bodhbarnü Parliament nung ashitsü. Ni tatalokbatem tatongi ashitsü,” ta ashi.
“Süpokrem agirtem anema onoki ken o mebenoktettsüsa parnoki kuli meyutsütsü, saka onoki (süpokrem agiba) kuli sayutsü,” ta minister-i ashi.
“Kuli ajak sayutsüji onok mapa. Iba ken o ya Parliament nung benoktsü, anungji ni osangbenertem den iba indang tejangja mejembiner,” ta Defence Minister-isa ashi.
“2014 küm tashi kechiba company anema temerenshi magütsü (?) Kechiba taoba UPA sorkari company ji blacklist nung medendaktsü,” ta Parrikar-i asüngdang.
“AgustaWestland company blacklist nung dendaktsütsü atema UPA sorkari agütsüba tetuyubaji sayuang ta ni Congress jazüker. Kechiba ibaji ozüng ajanga manentsü’ar parnok nem tama langzüdakjang. Ozü (NDA) sorkar mapang nung onoki iba ya anentsü,” ta Minister-i ashi.
2013 küm Italy linüki AgustaWestland kibur Finmeccanica tongti-i süpokrem agütsüba atema apuba sülen iba ken o temai adoka liasü.
Italy court-i aitsüsang AgustaWestland tongti, Giuseppe Orsi-i sen crore 3,600 indang helicopter alitsü tezüngzüktep agitsü atema company-i Congress nung bangdak lenirtem nem süpokrem agütsü ta shiogo, ta osang angazüker. AgustaWestland Chopper tezüngzüktep atema süpokrem ken o nung yashia Union Minister, Ravi Shankar Prasad-i, UPA yimsüsüba mapang iba atema tezüngzük agi, anungji  Sonia Gandhi aser Rahul Gandhi nati telangzüba agütsütsüla, ta shiogo.
Prasad-i Sonia Gandhi dang, “Yimlibilema süpokrem agir tenüngtemji shiang, kechiyong telemteba ajakji UPA sorkar yimsüsüba mapang liasü,” ta ashi.