Parrikar-i Rajnath ajurua J&K aser BRICS Summit atema jembi

New Delhi, September 23 (Agencies): Hokolbarnü Union Defence Minister, Manohar Parrikar-i Union Home Minister, Rajnath Singh ajurua pa den Jammu & Kashmir tensa aser taruba ita Goa nung BRICS Summit atema security renemshitsü densema onük aika nung o lemtepogo.
Ghonda tesadangka senden amendang senior minister anati tang Kashmir Valley tensa aser arrtsülen nungi telungpurtem linük telungi aitba onük nung o lemtep, ta ketdangsertem osang ka ajanga metetdaktsü.
Iba senden nungsa mejangjatetba nisungtem Maharashtra tzüyimkümlen anguba tebilemtsü onüka jembiogo.
Rajnath Singh aser taoba mapang Goa Chief Minister, Parrikar nati October 15-16 anogotem nung Goa yimtiba, Panaji nung BRICS Summit alidang security renemtsü atemaa o lemtep.
BRICS senden nung Brazil, Russia, China, South Africa linüktem nungi Tirtem aser India nungi Ato kilonser, Narendra Modi adentsü.
Ano külen Kashmir nung maneni tanü agi anogo 77 tongkanga tensa mejungi lir.
Muslim nunger Hokolbarnü sarasadem sülen tensa raksatsü arendaka bilemba ajanga tanüa Srinagar tesem aika nung curfew ozüng benoka liasü.
Srinagar densema Valley tesem aika nung dokantem, shishilembaba tesemtem aser petrol pumps shibanga liasü iba den külemi public transport-a mesenzü.
Iba dak alia School, college aser tanga shisaliok rejutema maneni shibanga lir.