Parrikar-i tenangzükba agiogo; Brihostibarnü ‘floor test’ agitsü

New Delhi, March 14 (Agencies) : Congress-i Supreme Court nung ken o benokba kokteter Mongulbar nikongdang Manohar Parrikar-i Goa nung Chief Minister inyaktsü tenangzükba agiogo.
Goa assembly elections nung BJP-i menden 13 nungdang takok nguteta jenjang anabuba nung liasü, saka parnoki nübo 21 anidena sorkar akümtsü maongka angu.
Tanü Parrikar den minister 9-i tenangzükba agi aser parnokji Maharashtrawdi Gomantak Party nungi Sudin Dhavalikar aser Manohar Azgaonkar, Goa Forward nungi Vijai Sardesai, Vinod Palienkar aser Jayesh Salgaonkar, BJP nungi Francis D’Souza aser Pandurang Madkaikar aser Independent MLA tem- Govind Gawde o Rohan Khaunte nungertem lir.
Manohar Parrikar-i Goa Chief Minister inyaktsü tenangzükba agitsü atema tanü Supreme Court-i lenmang sadema lapoktsü. SC-isa Brihostibarnü ‘floor test’ agitsü tetuyuba agütsüogo.
Tenangzükba agiba sülen osangbener den jembidang Parrikar-i Congress aitsü.
Bharatiya Janata Party (BJP)-i state nung nübortemi agütsüba tashi auyatsü meranger ta aitbaji atema Parrikar-i ashiba agi, “Nenok (Congress) ket nung nübo peria ali asübo, kechiba nenok Governor dangi mao.? Hau, tashiji lemsar liasü, saka MLA 22 longjemerbo sorkar akümtsü tashi peria lir.”
Goa renloktsü atema tanga MLA temi BJP pusema nungit. MLA shingaia Congress pusemtsü memulungi liasü, ta Parrikar-isa shisem.
Ajisüaka, Congress-i ashiba agi, Brihostibar ‘floor test’ agidang Parrikar’er sorkari tamakok angutsü.
“Manohar Parrikar-i anogo ana atema chuba kümnüra, akümtsü akok” ta Congress-i metetdaktsüogo.