Party agi tebok masüngtsü

Asenok Nagaland nung alirtem aikati yimten telok (political party) nung adenba agi tebok asüngtsü amai bilemer. Iba jagi yimten telok tentetba nükjidong angatetba agi masü saka party nem asen taküm aser kibong mesüdaktsütsü asoshi asenoki political party ka nung mesüra ka nung adener. Ibayongji lenirtemi dang masü saka nübortemi dena opposition nungbo kenüa melitetter. Ajisüaka, party-i masü saka asenokiang party mesütsüla ta tangatetba kati maru tashi party kisüng melenba agi peia tebok mesüngtettsü aser tangar asoshia kecha meinyaktsütettsü. Tang amaisa asenok dak party nem mesüdaktsütsü tangatetba alinungbo, ashiko, asüngbo Naga nunger ajak BJP akümtsüa akok, kechiyong tang center nung BJP teloki yimsü asür, anungji parnok den aden nung dang senotsü teyari talubosa angutsü amai asenok bilemtsü. Ajisüaka, yashi amato masü, tanübo party kija melenba agi mapa meinyak chiyonga kazütsüsabo mapang marutsü. Ibai mapa inyaker chiyongba putu lir aser mapajia mashimashi masü shitak inyaker. Aji oda, asenoki party melenba agi tebok sünga alitsü tangatetba nung BJP nung denra asenoki BJP akoksatsür asütsü. Joko, küm ana lir külenbo asenoka ano ken election agitsü, iba mapang tang yimten telok balala nung alir yimsüsür, lenir aser nübortem ya kong koba yimten telok nung adentsüar memetet. Karbo sen teimba agütsüba telok nung adentsüa akok mesüra karbo takoklen apia yimten telok nem mesüdaktsütsü asoshi adentsüa akok. Item telok jagi taruba election nung takok ngura ano tang amai küm pongo timatemtsü, kechiyong  election nung vote melen sen ishika meshia agiba agi kibong memesütettsü aser yimten telok nem mesüdaktsütsü tebilemba nung election-i aiba aser yariba agi tebok sünga malitsü. Yashi tashi asenoki Congress nung adenba agi mesüra NPF nung adenba agi tebok sünga alitsü amai bilemba agi tang ya asenok kangshir aser ano BJP nung aden nunga kasa dang asütsü. Aji oda, asenok tebok sünga jangratema alitsü asoshi party masü asenok tangatetba melentsüla. Tangatetba melenerbo kechi party nung dendir denaka tajung asütsü, kechiyong idangjibo party-i asenok mesütsü masü saka asenokiang party mesütsü. Iba tangatetba nung tangarbo tanur asüdang nungi tambur küma, opposition nunga süang, ruling nunga süang, party memelenshii akangakanga nokdaker. Aji oda, party-jiang pei senmang ama kümadoker. Nagaland nunga iba ama yimten angatetba mapang ka metenzük tashi alima merenloktsü aser nübortem kanga timatemtsü. Aji oda, Nagaland nung yimten yimsüsürtem ajak NPF asüba agi nübortem tebok sünga malitsü mesüra Naga nunger ajak center nung yimsü tesüdak telok BJP nung adenba agia tebok masüngtsü. Tebok asüngtsü atemabo peisasa inyaktsüla. Ajisüaka, asenoki mapa meinyaker ser yimten telok nung adenba kija agi tebok sünga linür. Atangji, alima nung tebok sünga alitsüba kija atema aru masü saka tebok asüngtsü nüngdakbaji mapa inyaktsü asoshi nüngdaker. Ajisüaka, asenoki asenoksasa tebok mesüngtetra asen nem nungloktsüba mapa inyaktsübaji pongmang asütsü. Nisung shia yimten nung shilem lir, anungji senso kaji yimten telok ka nungbosa adentsüla. Aji oda, yimten nung dena shilem agibaji tai masü saka shilem magibajiang tai asütsü. Ajisüaka, yimten nem asenok mesüdaktsütsü tangatetba nung asenoki shilem agira, iba jagi yimten tashimait adentsü aser asenoka takoksa angutsü. Aji oda, tangbo party melenba dang nungibo tuluba asenok tangatetba melenshir, teloki kechi agütsür ta masü niang telok nem kechi agütsütsü ta bilema yimten nung shilem agitsüla. Idangjibo, asenok nisung shiai candidate dang kechi meshitsü  ta masü saka nia candidate nem kechi agütsütsü ta dang bilema yaritsü. Iba jagi dang asen lima renloktsü, topur ajungtsü aser asenoka asen lima nung asen lima asoshi takok ngua inyakba senso kaka ama nümadanga alitsü.