Party atema masü saka linük atema mezüng bilemer: Modi

New Delhi, Luroi (August) 15 (Agencies): 72 buba Independence Day nung Prime Minister Narendra Modi-i India’er manned space mission indang osang metetdaktsü.
2022 tashi nung “India jabaso mesüra jala kati linük wako amer anünglaki atutsü” ta Modi-i ashi.
Modi-isa tongtipang osang metetdaktsüba rongnung, alima nung sorkari teyari agüja inyakba healthcare programme tulutiba Ayushman Bharat indang liasü. Iba mapa ajanga nisung crore 50 ajangzüktsü.
Tanü Red Fort nung Modi-i aniba NDA sorkari küm pungububa ketdangsüa arudang takok anguba osangtem metetdaktsüdang “Onoki telemtetba tasaktem agiteter kechiyong onoki party atema masü saka linük atema mezüng bilemer” ta Prime Minister-i ashi.
“Tanü ni Red Fort nung noktaker linük nem osang tajung ka sangoktsünür. India-i space science nung kanga tejakleni aoer aser 2022 küm India-i 75 buba Independence Day amungdang, asen jabaso mesüra jala kati linük wako amer anünglaki atutsü” ta Modi-i ashi.
US, Russia aser China sülen anünglaki meimchir ka yokba linük pezübubaji India asütsü, ta paisa shisem.
Ayushman Bharat koba dang “Modicare” ta ajar, iba mapa ya Rongjui (September) 25 nü sayatsü. Iba anogo ya Bharatiya Jana Sangh tenzüker Deen Dayal Upadhyay tasoba anogo lir, ta Modi-isa metetdaktsü.
“Asenoki asen tetenzükdak meyipa mereprangra asenoki kobika arua’ar memetettsü. Asenoki 2013 nung tetenzükdak ama ammeter reprangdangra, tejakleni anguba aika angudang nenok süngmangtsü. Alimai India nung electricity maliba, alenbangba indang kanga jembi, tanü mejanga aliba shiti jajatsü tenzükogo ta alimai ashir” ta Modi-isa Congress luja olen ka jembi.
PM Modi-isa tetsür dak tashiyim mapa inyakba atema kümdangtsü ashidang, “Tashiyim agi shi nung medemba tatalokbatem anema akangakanga inyaker. Aibelenertem tepuokdak ayuba indang osangtem sangdongtsüla. Linük nung ozüngji tematiba aser shingaia ozüng alema meinyaktsüla” ta metetdaktsü.
Paisa Kashmir indang jembidang, “Atal Bihari Vajpayee-i — Insaniyat, Jamhuriyat, Kashmiriyat ta ashiba lenmang nung tejakleni aotsü. Onoki iba lenmang nung jajanür. Onoki injang aser tashiyim mamshinür, onoki linük meimba Kashmir nunger dak azüitnür” ta ashi.
“Tanü alima nung India jenjang tajungba kümogo. Alima nung linüktemi India nunger pelashishia agizüker. Indian passport tashi tuluba kümogo” ta Modi-isa shisem.
Paisa, triple talaq anema ozüng yanglutsü aser northeast kübok tesem aika nungi AFSPA agientsü ta nangzük.
Independence Day onük atema PM Modi-i nübortem dang nungi tebilembatem meshi. Pai iba mapa ya taoba küm asem tashi inyaka arur.
MyGov.in website nung nübortemi pa den tebilembatem lemsatepba nung tetsür dak tashiyim inyakba, tema nung metsümeshiba, reservation system aser education onüktem ashi.