Party-i pei khuret nungi jena maotsüla: Shatrughan Sinha

Patna, November 12 (Agencies): Brihostibar nü film actor aser BJP Lok Sabha MP, Shatrughan Sinha-i, Bihar election nung tamakok anguba bentettsü khuret nungi party-i jena maotsüla, ta ashiba den külemi party lenirtem dang pa Rajya Sabha züngsem ka ama mezüngshitsüla, ta amokmerenogo.

Sinha-i twitter ajanga, “tang (Bihar assembly election) osang sangdonger asunungji tamakok kanga mejungi anguba atema asenok jashir, iba khuret mebenteti asenok jena maotsüla,” ta ashi.

Mongolbar nü L.K. Advani aser Murli Manohar Joshi na densema BJP lenir taintemi, Bihar tamakok anguba kuli jungjunga bushisüngdangtsüla, ta takhangba agütsür aliba mapang ka nung tanü Bollywood actor tain Sinha-ia item o jembiogo.

Taoba mapang Union minister Sinha-isa, party lenirtemi pa Rajya Sabha züngsem ka ama mezüngshitsüla, ta amokmerenogo.

“Ni Rajya Sabha MP ka masü. Nüburtemi yariba ajanga ni yangi (Lok Sabha MP) lir aser vote aika ajanga Lok Sabha election ana nung takok nguogo. Ni pusemer jenti lir,” ta Sinha-i ashi.

Sinha-i ashiba agi, pai tebilemba tajung nung kanga nendaka meranga inyakaka Bihar assembly election atema BJP nüboyimba sentong nung party-i pa sentok.

“Ozü tembartem, vote agütsürtem aser pusmertem sentokogo,” ta pai ashi.

Sinha-isa, pai kodanga Bihar chief minister kümnüa maliasü, ajisüaka state nüboyim sentong nung pa nem-a shilem agidaktsü asübo election osangji balaka süla, ta ashi.

Pai maneni nenshia, pai kecha yimya agia BJP anema meinyak, ta metetdaktsü.

Party anema inyakba mapatem atema party-i pa nem temerenshi agütsütsüa akok, ta olulubo jembidar.