Party-i takok ngura Akhilesh Yadav CM asütsü: Shivpal Yadav

Lucknow, October 21 (Agencies): Tanü Uttar Pradesh sorkar tashi nung aliba party,  Samajwadi Party (SP) senden nung Chief Minister, Akhilesh Yadav maden, ajisüka iba senden nung state party tongti, Shivpal Yadav-i assembly election nung pa party chief minister candidate asütsü, ta sangdongogo.
SP tongti, Mulayam Singh Yadav teno, Shivpal-i tedi’er jabaso Akhilesh SP district aser city units presidents senden nung adentsü jaoka liasü, ajisüaka Akhilesh-i iba senden nung maden.
Senden nung adenertemi ashiba agi, Shivpal-i Samajwadi Party chief minister candidate ji Akhilesh asütsü ta sangdong. Anogo ishika tejaklen Akhilesh tebu, Mulayam-i, tasen shimba MLA temi Chief Minister shimtsü ta metetdakja liasü.
Senden nung Shivpal-i, “Party tashii arura Akhilesh Yadav taruba CM asütsü. Pa asen CM candidate asütsü,” ta metetdaktsü.
Kasa senden nung Shivpal-i, taruba assembly election atema renemshitsü ajungshiba den külemi November 5 nü state yimtiba nung party silver jubilee benjungmung takok ngua katettsü atema junga renema alitsüla, ta ashi.
Taoba ita ishika Akhilesh aser tebu tanubo, Shivpal na tsüngda mangatettep lir aser Akhilesh-i Samajwadi Party tongti aser tebu, Mulayam dang November 3 nü nungi tenzüka pai sorkari inyaktetbatem sangdongba mapatong tenzüktsü, ta metetdakja liasü.