Party masü nisung dang shimtsüla

Küm ishika ogo, mapang ka Nagaland nung Congress dang liasü aser tang NPF dang küma omadagi. Ano, center nung tang yimsü tesüdak BJP telok yagi taruba küm ter tsüngda tajungba yimsü süa ao nungbo, iba mapangjibo Nagaland nung BJP dang küma omatsü ana nung lir. Ashiko, tan Bihar election nung BJP teloki ka takok angu asübo tang anogo ishika tsüngda ya Nagaland nungbo BJP nütsüng ishikabo renloker lila ta bilemer. Iba amai election ka nungi ka atongdang yimsüsürtem rongnung party melenshipet melenshir aliba ya nübortem asoshibo temangmangtsüka lir. Yimten tsütsü telok ka nung adenba o tamangba yimsü tsütsü yimsü ka agizüka amangba na mesüktepa lir. Aji oda, khen Khristan südangli, khen Muslim nunger südangli aser ano khenbo Hindu nunger südangli ta nisung kati tamangba yimsü melenpet melena amangra, tangari kechi bilemtsü aser pajia kong atemtsü ? Ibaji mesüka, election nung yimten ka tenüng nung aitsü aser adoker yimten kati aotsü aser ano tanaben election nungbo yimten telok tanga ka nungi aitsü ta tamongdak ka mamong jajara, pajia tatem nung kong atemtsü ? Yimten shia ya tangatetba aser nükjidong balala anungji nisung ka yimten telok ka nungi kati aotsü aser arutsü ta senzütsübaji tim masü. Ajisüaka, yimten telok ajak tangatetba ka aser nükjidong ka dang asünungbo, yimten telok tenteta alitsü menüngdaker, anungji election nunga yimten telok tenüng nung masü saka pei pei tangatetba nung tokteptsü aser sorkar yanglutsü ta asüba tajungba asütsü. Nagaland nung balaka Naga nunger dak yimten khuret angatetbabo lir saka yimten telok (party principle) angatetba mali, kechiyong ibaji Naga nunger yimten sobaliba nung mali. Naga nunger yimten nung telok (party) mali saka kin kidongi dang yimsüsür shimer yoker. Iba amaji Nagaland nung yimsüsürtem shimtetba yimya ya melenshitet asübo kanga jungla ta bilemer. Naga National mesüra Regional party tenüng nung election nung tokteptsü saka adoker Indian National party nung adentsü, Indian National party tenüng nung tokteptsü saka adoker külen Naga National/ regional party dangi meyiptsü ta asüba maparen nung tangatetba tajung ka mangur. Ibajibo opposition nung ali maremba dang asütsü. Aji oda, Nagaland nung Indian National party-temi Naga yimten tebilemtsü latettsütsü aser terenlok mapa inyaktsütsü aika nangzüaka, aji tiyazü, kechiyong Naga nungba mulungjang nungji yimten tebilemtsü koktettsüsa shisabolua bilemer masü saka minister akümtsü bilemer aser minister kümer takar akümtsü bilemer aser ano takar kümer electioni aitsü bilemer ta asüba tebilemba nungji dang asenok Naga nungertem tanen  maka longpet alonger. Iba kasaji Naga nunger Regional party nung adenertemia Naga yimten tebilemtsü latettsütsü asoshi election aru shia jembia jembia Naga yimten dang nungibo ali rongsenang tuluba aser temaba kümdaktsür, yimsüsütsü masü business inyaktsü asoshi yimsüsüba menden nung amener ama angur. Naga nunger asoshi tatem maka takoksa angudak tesemji itemji lir. Iba yagi Naga yimten tebilemtsü mekoktetter aser alima merenloktetter. Anungji, Naga nunger asoshi temelenshi nüngdakbaji tang agiba ‘election system’ nung nüngdaker. Nagaland nungbo sorkar nunga party ka dang sünüba amaji election nunga party ka dang asütsüla. Tetezü party malitsüla. Idangji dang nübortemia party masü nisung shimtsü aser aser party-i masü saka nisungi yimsü asütsü. Idangjibo election mapang party atema sen endoktsü nüngdak madoktsü aser election nung adoker külen party melenshitsü lenmang malitsü. Naga nungerbo Indian election system nung party agi mazük, anungji party malitsüla. Iba jagi dang election-a junga agitettsü aser nübortemi  tetemsü nisung shimtettettsü. Idangjiang, yimsüsürtemji party-i masü saka nübortemi shimtettsü.