Party shingaia NRC list tembanga merenemdaktsüner: Gogoi

Guwahati, January 05 (Agencies): Congress lenir tain aser taoba mapang Assam Chief Minister, Tarun Gogoi mapang nung NRC update asüba inyakyim tenzüka liasü, aser Brihostibarnü pai, state nung India nunger senso tenüng list asüba inyakyim ya pai tenzük, ajisüaka tang iba inyakyim ajanga pa mepelar, ta metetdaktsü.
Gogoi-i, “Ni kanga mepelar, kechiyong iba inyakyim ya ni tenzük, iba den külemi Aasu mesüra (Prafulla) Mahanta mesüra Sarbananda (Sonowal) nungeri NRC update mesünüi liasü. Assam Accord nunga iba inyakyim indang mejembi,” ta metetdaktsü.
Gogoi-isa pa mepelaba kuliji, electoral roll nung tenüng aliba MLA tem aser MP tem, shirnok election nung tokteptsü temsüa lir ta Election Commission-i agizükogo, item tenüngji December 31 nü sangdongba NRC mezüngbuba draft nung densema mali, ta metetdaktsü.
“Muslim aser Bengali oshi jembirtem aika aliba tesemtemji ‘sensitive areas’ ta züngshir, anungji item tesem nung kanga nendaka inyaktsüla asü. Sorkari item tesem nung security sepaitem lemzüktsü, ajisüaka item tesem nung iba inyakyim junga meinyak,” ta paisa ashi.
Ajisüaka AASU adviser, Samujjal Bhattacharya-ibo kaketshir tentet (Aasu)-i NRC update asüba anemer ta aitsüba kuliji Gogoi-i agütsütsüla, ta shiogo.
Pai, “Pa küm 15 tashi chief minister inyaka liasü, aser iba maparen nung onok densema aliba paia meteta lir,” ta ashi.