Party tashi aittsü atema State BJP-i inyaktsüla: Kohima BJP

Kohima, October 19, 2017 (TYO): BJP Nagaland State-i kanga aritepa BJP Kohima District Tir, Dr Khriezovolie Kesiyie aser par telok ketdangpurtem agientsü atema telemtetba agiba atema BJP Kohima District-i nemjema maneni oleplang agütsütsüsa akumer, ta tanü BJP Kohima District nungi Seyiekhrielie Nagi-i sangdong ka nung metetdaktsü.
“Onoki shidi aika ajanga tang mepetmesü ‘BJP Kohima District Tir, Dr Khriezovolie Kesiyie anema yazü tai tongloktsüba’ ya tajungtiba nung latettsü atema metetdaktsü, ajisüaka BJP Nagaland State lenirtemi iba mepetmesü bentettsü melen district nung ketdangpurtem mesüzüka tentet level ajak nung telemsa adokdaktsüba atema onoki mepelar,” ta sangdong nungsa shia lir.
Iba sülen State BJP-i temzüng alema BJP Kohima District Tir, Dr Kesiyie agien, aser pai-a pa anema tai tongloktsübaji tajungtiba nung bentettsü atema menden nungi alu, ta sangdong nungsa shia lir.
Pai telemtetba agibaji BJP Kohima district ketdangpurtem den Yuva Morcha, Mahila Morcha, Kisan Morcha, Minority cell, Trader’s Cell, Executive Members, State Council Members aser Mandals ajaki pusema party nungi manenaka pei menden nungi alutsü lemtet, ta sangdong nung shia lir.
August 29, 2017 nü district ketdangpur kari Dr Kesiyie anema onük kar agütsü, saka iba onük reprangba sülen October 12, 2017 nü state office nem osang agütsütsü atema State BJP office-i Disciplinary Action Committee official nem nungloktsü.
BJP Temzüng, Arrla XXV kübok temzüng aser inyakyim alema BJP State Tir, Visasolie Lhoungu-i pa kijai melungteta Dr. Kesiyie agientsü lemtet aser BJP Kohima District atema Tir tasen shima liasü.
“BJP Kohima District nungi anenertem, Assembly Constituency pongu nungi Frontals aser Mandals ketdangpurtemi maneni BJP Nagaland State dang BJP Party jenjang ajungtsü atema tang mepetmesü aliba ya bentettsü asoshi akhanger,” ta sangdong nungsa shia lir.
“State nung BJP ajungkettsü atema onoki maneni inyaktsü, iba den külemi BJP State ketdangpurtemi state nung BJP-i takok angutsü atema tamendakdak nungi tashi aittsü aasoshi inyaktsü ta onoki imlar,” ta kasa sangdong ajangasa metetdaktsü.