Party tem aser candidates-i election nung metokteptsü mepishir: Naga tribal hohos

Kohima, Aenjeti (January) 25 (TYO): Nagaland nung tongti tribal Hohos indang Core Committee-i yimtenren party tem ajak dang, aser Tsüklai (February) 27 nü election nung tokteptsü tebilemba alir candidates ajak dang election nung metokteptsü mepishia metetdaktsüogo.
Yasüng Kohima nung Nagaland nung tongti tribal Hohos indang Core Committee senden amendang iba tayongzükbaji metetdakja liasü.
Tanü Angami Public Organisation Convenor aser Advisor, Dr Vilhusa Seleyi aser Co-convenor, Kekhwengulo Lea nati sangdong ka ajanga, Nagaland nung urban local bodies (ULBs) election agitsü onük dak sendakba nung 2017 küm tetenzüklen nungi senden aika mena arudar, ta metetdaktsü.
Tang India sorkar aser Naga yimtenren teloktem tsüngda ken o tejembidak ajanga tang loktiliba aser yimtenren tensa atema senden amenba sülen tribal hohos-i, “Tang Naga yimtenren onük latettsü atema ken o tejembidak mapang ka nung 13th Nagaland Legislative Assembly atema election agitsüji tim masü, aser ibaji külem obang ka lir, aser Nagaland nung aliba nübur taginüba lir,” ta lemtet.
Anungji tongti tribal hohos-i yimtenren party ajak aser candidates ajak dang Naga linük meimba shisatsü sayua election inyakyim nung shilem magitsü aser election nung tokteptsü atema tenüng magütsütsü mepishir, ta kasa sangdong ajangsa metetdaktsü.