Party tem dangi tenla arubaji Aadhaar den sendakteptsüla: Manish Tewari

New Delhi, April 29 (Agencies): Congress lenir tain aser taoba mapang Union Minister, Manish Tewari-i, yimtenren party tem dangi tenla sen arubaji Aadhaar den sendakteptsüla, ta takhangba ka agütsü.
Honibarnü Tewari-i, party tem dangi tenla arubaji Aadhaar den sendaktepba ajanga yimtenren senotsü nung ochishi tali alitsü, ta ashi.
Corporates temi yimtenren nem tenla agütsüba nung shilem magitsüla, ta paisa ashi.
“Party mashii ka dangi tenla aruba nungji ‘address’ alitsüla. Nisung kati sen lakh 1 mesüra sen lakh 5 tenlaba sen ajakji Aadhaar den sendakteptsüla,” ta pai ashi.
Association for Democratic Reforms (ADR)-i ayongzükba 13buba electoral & political reforms senden nung jembidang Congress leniri, “Aadhaar den sendaktepba ajanga senji kong nungi aru, ibaji jangjatsü. Nisung kati sen 20,000 tenlaba nungi sen 2,000 tashi ajema alutsütsü menüngdak, kechiyong ibaji ajanga coupon 10 tali menüngtsüsa akumtsü,” ta ashi.
Corporates-i yimtenren nem tenla agütsüba nung Supreme Court-i obendang agütsüba nung ajemdaker Tewari-i, “Au, corporates ket nung Aadhaar cards mali. Corporates-i parnok indang shareholder tem atema tajangzük bushir. Yimtenren nem tenla agütsüba maparen nung parnoki shilem magitsüla,” ta ashi.
Congress lenirisa, yimtenren party temji Right to Information Act (RTI) küboki aitdaktsü nung dang yimtenren tenla nung ochishiba alitsü, ta ashi.