Party tem longjemra mapa tulu inyaktettsü: Modi

New Delhi, August 28 (Agencies): Parliament House anaprong nung GST Bill agizükba sülen tanü Ato kilonser, Narendra Modi-i iba bill agizüktetba atema party ajak nem tenüngsang agütsü.
Party ajak longjemra mapa tulu inyaktettsü, aser iba atemaji GST bill agizükba ya tatishitsü ka lir, ta pai ashi.
Ita shia radio programme ‘Mann Ki Baat’ sentong nung jembidang Modi-i, “Party balala tsüngda mokmok-achi lia kati ka aitsütepaka August 2016 ita nung GST bill agizüktsü atema party ajak longjema liasü,” ta pai ashi.
“Iba atema tenüngsangji party ajak nem agütsür. Iba ya party ajak longjemer nükjidong ka atema inyakba tatishitsü ka ka lir,” ta paisa ashi.
Mapang talangka magizükteti aruba Constitution amendment bill ajanga linük nung saru tasen, GST ozüngtem benoktsü atema lenmang lapoktsüogo.
Iba bill ya Rajya Sabha nung August 3, 2016 nü agizük aser Lok Sabha nunga August 8, 2016 nü agizüka liasü.
GST ajanga Centre aser state temi saruba saru melentsü, item rongnung central excise duty, service tax aser central sales tax den sale of goods & entry tax atema (Value Added Tax) VAT densema lir.
2015 küm Lok Sabha nung iba bill agizüka liasü, ajisüaka Congress-i iba bill nung ozüng kar temelenshi benoka nokdangba ajanga Rajya Sabha nung magizükteti aru.