Party temi nangzükba ama meinyakba atema langzütsüla: CJI

New Delhi, April 08 (Agencies): Election mapang nung nangzükba ama meinyaker aser manifestos ji tezüluba shidi ka dang akümer, iba atema yimtenren party temi telangzüba agutsütsüla, ta tanü Chief Justice of India (CJI), J.S. Khehar-i ashi.
Tanü New Delhi nung ‘Economic Reforms with Reference to Electoral issues’ seminar nung jembidang Khehar-i, “Tanü-asüngbo manifestos ya shidi kaket ka dang kümogo, iba atema yimtenren party temi telangzüba agutsütsüla,” ta ashi. Iba senden nung linük Tir, Pranab Mukherjee-a densema liasü.
Khehar-isa, election mapang nung nangzükba ama meinyakba atema lenirtemi, ‘züngsemtem tsüngda telemtetba ka dangi maru’ ta tatemtsü jembir, ta ashi.
Pai ashiba agi, Supreme Court-i Election Commission dang election mapang nung angati osettsüset lemtsüba anema telatetbatem yangluang ta tuyu, aser iba mapang nungjagi election commission-i Model code of conduct (MCC) alema inyakba party tem nem temerenshi agutsür.
Justice Dipak Misra-ia, “Election mapang nung tashi malizüktsüla, aser candidate shiai election nung toktepbaji invest asür masü ta angatettsüla,” ta ashi.
Nüburtemi candidate temji parnok libaliro tajung nung ajemdaker shimtsüla, ta shia paisa, “Vote agutsürtemi tatidangtem kokteta vote agutsüi aoba anogoji democary atema sentsüwangshi anogo ka asütsü,” ta ashi.