Parveen Rana-i Yadav melena Olympics nung shilem agitsü

New Delhi, July 27 (Agencies): India nunger melangteper, Narsingh Yadav melena Parveen Rana-i India tenüng nung Rio Olympics nung shilem agitsü renemba osang ka United World Wrestling (UWW)-i tanü, Bodbar nü metetdaktsüogo.
US kübok Las Vegas nung agiba 2015 World Championships nung bronze medal agizüka, Rio Olympics nung shilem agitsü temeten angusang, Yadav-i ozüng alema tali tashi itshitsü mozü mora achiba putetba sülen Indian Olympic Association (IOA)-i pa anema tetoktepba balala nung shilem magitsü tenokdangba benoka lir aser iba yongji, pa melena  Rana-i Olympics nung shilem agitsü temeten angur lir.
Yadav-i ozüng alema methandienone mozü achiba osang taoba Deobar nü putet aser pa den sendaktepba ken o indang o bendang asüng, Brehostibar nü agütsütsü renema lir.
Yadav-i Olympics nung shilem agitsü temeten agütsütsü tetendangba tetoktepba nung Rana madak temang touzük seret 74 taret shilem nung takok ngua liasü.
Tan ozüng alema mozü mora achiba ken o adokba jakdang taoba mapang Olympic medal 2 ben tashi agizüker India nunger melangteper, Sushil Kumar-ia Yadav anema Delhi High Court nung Olympics nung shilem agitsü den sentakba ken o benokba osang bushitetogo.
Yamaji ataokba sülen Wrestling Federation of India (WFI)-i Rio de Janeiro nung India tenüng nung toktepdaktsütsü asoshi Yadav yoktsü lemteta liasü.
2016 Rio Olympics Brazil kübok Rio de Janeiro yimti nung taruba August ita 5 nü nungi tenzüka 21 nü tashi agitsü sentong renema lir.
Ano külen, taoba June ita 29 nü tanaben tendangba sülen India nunger shotputter, Inderjeet Singh-i ozüng alema mozü mora machiba osang bushitetogo.
Ajisüaka, taoba June ita 22 nü tendangdang pai mozü mora achiba osang bushitetba yong pai 2016 Rio Olympics nung India tenüng nung toktepa shilem magitettsüsa jenjang tamajung ajuruogo.
2015 Asian championship gold medallist, Inderjeet-i taruba küm 4 tashi tetoktepba balala nung shilem magitsü tenokdangba agizüktsü akok.