Pasighat mi lendong nung dokan 67 rongtok

Itanagar, January 31 (Agencies): Arunachal Pradesh, East Siang district, Pasighat shishilembaba tesem tiyong nung Brihostibar aonung mi adoka tajemba agi dokan 67 rongtokba den anasa aliba süngjanglijang ayokba dokan-a ka tera arong.
Iba lendong agi nisung yiruba osangbo kecha mali aser mi ya kong nungi adok-ar ano tejangja memetet, ta osang ajanga ashi.
Deputy commissioner Isha Khosla, SP R S Chauhan, LS MP Ninong Ering aser district disaster management officer (DDMO) nungeri lendong tesem semdang aser iba mapang parnoki nüburtem dang lendong atalokba tesem nungi pila alitsü tetuyuba agütsü.
Additional deputy commissioner Deepak Shinde, zilla parishad chairman Kaling Dai, Pashigat Municipal Council züngsem rongnung tongtiba Denong Tamuk aser ward ajak nungi züngsemtem ajaki lendong atalokba tesem semdangogo.
Fire brigade ana, PH Constructions nungi tanker ka den JCV ka aser kidanger state Jonai, Assam nungia fire brigade ka jaoka iba mi remsep.
Yamaji meranga inyakaka dokan 67 tashi meshimeshia rongtok. Mi remsepertemi bendanga agüja inyakba ajanga gondha ana tsüngda nung iba mi tesashi remseptet.
Mi lendong agi kongshir shia nem Hokolbarnü District administration-i tang rongdak teyari atema sen 38,000 agütsü.
Deputy commissioner Isha Khosla-i, Pasighat nung mi lendong mapang shia ataloker anungji ajaki mita aser kümdanga alitsüla, ta nüburtem dang ashi.
Iba tesem nungi MLA Kaling Moyong iba mi lendong ajanga kanga aoksa aser pai, lendong agi kongshirtem asoshi teyari bushitsü atema pa Angh tonga tsüngtong aotsü, ta ashi.

You must be logged in to post a comment Login