Pastor telok ka ashioktsür apu

Dimapur, March 16 (TYO): Dimapur police-i March 12, 2020 nü Delhi nung amenoker inyakba travel agent ka apu.
Iba nisung yagi Holy land tour aotsü atema Dimapur nung pastor telok ka dang nungi Rs. 36,65,000 meshiba sülen parnok ashioktsü.
Travel agent ji Ripu Daman Singh lir aser pai Trip Craving (Travel agency) lapoka lir. Pa ya Dimapur police telok kati Chander Vihar, West Delhi nung apu aser pa ket nungi passports 40 tashi ngutetogo.
Brihostibarnü pa apuba sülen March 14 nü pa Dimapur-i anir aruogo.
September 2019 ita Holy Land tour atema Ripu den online ajanga visa, air tickets renemtsü atema tongtep aser iba atema pa nem Rs. 36,65,000 agütsü. Ajisüaka, pai mapang shitak nung kakettemji magütsü aser pai mepishiba ama pastor telok jagi February 14, 2020 nungi Holy Land tour aotsü atema mapang melenshia liasü.
Ajisüaka, Ripu-i parnok nem taila air tickets aser itinerary yok. Iba jagi pastor telok jagi pa dang sen den passports 40 meyipjang ta ashi saka pa nungi telangzüba kecha manguba sülen pastor teloki East police station, Dimapur nung FIR ka benok.
Iba ken o nung ajemdaker Dimapur police nungi telok ka Delhi-i ao aser tai tongloktsüsang apu.
Dimapur police-isa Nagaland nung alirtem dang iba ama ashikülakertem dang nungi kümdanga alitsü aser kuli tejangja melii senotsü magütsüteptsü metetdaktsüogo.