Paswan-i Nagaland nung Food Security Act tenzüktsü ajungmesor

April 15, 2016 nü Dimapur Airport nung Consumer Affairs, Food & Public distribution Union Minister, Ram Vilas Paswan-i party nung inyakertem den külemi agiba noksa angur. 

Dimapur, April 15 (TYO): Nübortem tajangzük angutsü atema Nagaland sorkari Food Security Act mapa küma inyaktsüla ta Union Minister of Consumer Affairs, Food & Public distribution, Ram Vilas Paswan-i tanü ashi.
April 15, 2016 nü Police Guest House Chumukedima nung osangbener den sensaksemdang, Paswan-i ashiba agi, National Food Security Act (NFSA) ya July 2013 nung yanglu aser küm ka tsüngda Nagaland dak alaka tanüngba state ajak nung NFSA mapa küma tenzük.
Linük kübok state 36 nungi Nagaland state nungdang Food Security Act metenzük lir, ta paisa ashi.
“Tang jangotsü 1 lakh 27,668 tonnes lemzüktsür saka kodang FSA tenzükdir 1 lakh 38,000 metric tones angutsü aser iba jagi state sorkar ajangzüktsü. Nagaland nung FSA tenzük nungbo yimtsüng tia nung alir noklang nung shilem 80 tashi ajangzüktsü aser ibaji ajanga nisung 100 nungi 80 shi ka dang wheat seret nung sen 2 aser jang seret nung sen 3 agi dang ayoktsü” ta Paswan-isa metetdaktsü.
Union Minister-isa jangotsü belenba nung sen endokba indang onük jembidang, Centre sorkari shilem 75 aser state sorkari shilem 25 menoktsü ta ashi.
“Nagaland-i jangotsü belentsü atema inyakba mapa nung hill transport subsidy teyari agitettsü. Iba teyari ajanga FCI depot nungi godown balalai jangotsü belentsü akok. Mapang tatsüka Nagaland-i iba subsidy magii arur” ta Paswan-isa shisem.
FSA mapa küma tenzüktsü atema tongtibang teinyaktsü pezü lir. Itemji- beneficiary list digitalization, online allocation, supply chain management aser grievance mechanism lir. Nagaland chief minister, T.R Zeliang-i tekaratiba nung state nung FSA tenzüktsü ta nangzükogo, ta Paswan-isa metetdaktsü.
“Nagaland nung FCI district ji Dimapur dang lir aser iba ajanga nütsüng yongsük lakh 20 shi ka nüngdak peritsür. Kobi melii Kohima jia FCI district kümdaktsütsü. Iba asoshi Kohima nung godown ka yanglutsü aser taküm September nung ni arua iba godown lapoktsütsü,” ta Union Minister-isa shisem.
Paisa, State sorkar dang FSA mapa küma tenzüktettsü asoshi teinyakttsütem inyaktsü ayongzük aser tekaratiba nung FSA tenzüktsü imlar ta shisem.