Paswan mesüra Manjhi nem CM menden agütsütsüla: Shatrughan

Patna, July 13 (Agencies): Hombar nü senior BJP lenir aser MP, Shatrughan Sinha-i, taruba Bihar Assembly election nung NDA chief minister candidate ji party (BJP) nungi shimtsü asü masüar ano melemteti lir, saka NDA teloktep party tanga nungi Ramvilas Paswan mesüra Jitan Ram Manjhi NDA chief minister candidate shimtsüla, ta ashi.

“NDA nungi chief minister ji BJP lenir ka asütsüla ta temzüng malitsüla. Union minister Ramvilas Paswan aser taoba mapang Chief minister Jitan Ram Manjhi nati aika ajangshia aliba apir iba menden asoshi tena tenüng benoka bilemdangtsüla,” ta Patna Sahib nungi BJP Lok Sabha züngsem Sinha-i Patna nung osangbenertem dang ashi.

“Tang mezüngpur Manohar Lal Khattar Haryana nung Chief Minister kümdaktsü. Süra kechiba Paswan aser Manjhi nunger nem Bihar nung menden temaba magütsütsü,” ta taoba mapang actor Sinha-i ashi.

Osangbenertemi asüngdangba ka langzüdang Patna Sahib nungi tanabenren Lok Sabha züngsem Sinha-i, Chief minister menden arishiba nung pabo densema mali ta ashi.

“Election campaign committee nung züngsem ka asütsü mesüra party menden ka atatsütsü asoshi parnoki ni mezüngshi. Patna nung April ita party tongti Amit Shah’er sentong ka nung parnoki ni majaok. Kechiba ni parnok dang nungi langa imlatsü,” ta BJP lenir Sinha-i mepelai ashi.

Taruba Bihar asssembly election nung pai kechi shilem agitsü ta asüngdangba langzüdang Sinha-i, “Tang tashi nungbo nisung shingaia Bihar election nung kü shilem mesüra khuret asoshi jembia mali, ibaji ajanga ni shisabolua aliba nisung ka masü,” ta ashi.

Sinha-isa party lenirtem dang, Legislative Council election nung tera agi takok anguba asoshi party lenirtem kangabo mepelatsüla, ta tekümdangtsü o shiogo.

“Lalu Prasad aser Nitish Kumar na ama lenirtem tashiji junga masadangtetra ibaji aibelen ka inyaker asütsü,” ta pai ashi.

“Delhi election nung atalokba ama, khenkhenbo tali ajungmesoba aser tali melung alemba ajanga teraksa bener arutsütsü,” ta paisa shisem.