Patanjali Ayurved aser Future Group na lokteper FMCG ayoktsü

New Delhi, October 9 (Agencies): Retail nung tetsüti Future Group aser Baba Ramdev-i ajungkettsüba (promote) asüba Patanjali Ayurved na lokteper Fast Moving Consumer Goods (FMCG) ayoktsü atema Hokolbar nü bangjemogo.

Nestle indang Maggi meyoki anenba ongdang nung Patanjali-i maongka agia taruba hopta nungi tenzüka noodles ayokba ajanga ita 20 tashi nung sen crore 1,000 tashibo yokzüktsü südi ta Future Group-i imla atar.

Company ana loktepba ajanga tarutsü mapang nungi külemi oset tasen yanglutsü/adoktsü aser tang aliba brand tem nung terelok tali bendenloka senteper brand tasen adoktsü tebilemba lir.

“Patanjali osettem (products) ajanga ita ka tsüngda onok store nung sen crore 30 nungi 40 indang business alitsü aser tatsüka lirbo sen crore 80 alanga tashi atutsü,” ta Future Group CEO, Kishore Biyani-i PTI nungi osangbanertem dang ashi.

Amenteter aliba FMCG amshirtem ket nung tang joko sen crore 1,300 – 1,400 alanga business lir, ta pai shisem.

“Patanajali osettem ajanga iba mesükba jenjang atongtsü ni amanger,” ta Biyani-i shisem.

Noodles-a amshitsü ta ashiba mapang, Ramdev-i, “Onok nükjidongji ‘Swadeshi’ ajungkettsü aser Multi National Company’ (MNC) tem den tokteptsü. Onok meyong noodles ji October 15 nü sayatsü aser ita tatem tashi nungbo linük asüngtsü,” ta ashi.

Pa ashiba agi, Patanjali-isa pasta, oats, juice aser muesli chiyungtsü tema memunoi sayatsü aser itemji dena küm tatem nung sen crore 5,000 ajangzüktsü nükla lir.

Future Group terenlok indang asüngdangba mapang Biyani-i, “Tan mongpu nung onok sen crore 22,000 nungi 23,000 tashi tajangzük alutsü nükjidong lir,” ta ashi.

Biyani-isa asiba agi, Future Group-i Patanajali osettem ayoktsü atema Haridwar nung office ka lapoktsü.

‘Patanjali Ayurved’ osettem ajungkettsüsang, yoga guru, Ramdev-i, ayurvedic osettem ajanga tanga mozü dang nung ‘platelet count’ tekaraba junga kümdaktsür, ta ashi.