Pathankot amakba ajanga Indo-Pak ken o menor: Sharif

Islamabad/New Delhi, January 30 (Agencies): Kiralongrartemi Pathankot (India) amakba ajanga India-Pakistan ken o jembitsü maparen menur ta shia tanü Pakistan Ato kilonser, Nawaz Sharif-i, “India den ken o jembitsü maparen junga oyaa liasü, saka Pathankot amakba ajanga ken o jembiba maparen nung kongshiogo,” ta ashi.
Sharif-isa, Pakistan-i kobi melii Pathankot amakba bushisüngdangba maparen atemtsü, ta ashi.
“Pathankot amakba nung ozü li amshia ali asü maliar bushisüngdangtsüji ozü khuret. Onoki iba ya inyaktsü aser tang tebushidak ken o ya kobi melii tembanga inyaktsü,” ta pai ashi.
January 15, 2016 nü India-Pakistan foreign secretary senden amentsü sentong liasü, ajisüaka kiralongrartemi Pathankot amakba ajanga iba senden thinena liasü.
India Ato kilonser Modi-i Sharif den jembiba sülen Sharif-i iba ken o bushisüngdangtsü atema intelligence, army aser sorkar ketdangsertemi akümba committee ka tenteta iba ken o bushisüngdangdar.
Pathankot amakba ken o nung India-i Jaish-e-Mohammad (JeM) tongti, Maulana Masood Azhar anema kuli aika Pakistan nem agütsüogo, ajisüaka tang tashi Pakistan-i pa anema kecha meinyaker. Iba amakba nung aibelenertem nem temerenshi tekaraba nung agütsütsüla ta India-i takhangba agüja, Pakistan-i aibenertem nem temerenshi magütsü tashi linük ana tsüngda ken o mejembitettsü, ta metetdaktsüogo.
India sorkar osang ajanga ashiba agi, Patahankot amakba ken o bushisüngdangba nung terenlok kar dang lira India-Pak ken o maneni jembitsü.
Kasa osang ajangasa, Pakistan-i aibelenertem nem temerenshi agütsütsüsa India-i Pakistan nem kuli peria agütsüogo.
Tamalen Pakistan High Commissioner-i, India-i parnok nem kuli tejangja agütsüra Pakistan-i JeM tongti lenir nem temerenshi agütsütsü ta jembia lir. “Pakistan-i kuli tejangja ngura, Masood Azhar ji Lakhvi tia-i maitsü ta ni züngpong ashir. Nija mesüra tentet shinga danga tai matoktsü ta ni ashir,” ta pai jembia lir.
Mumbai amakba ken o nung aibelensang Zakiur Rehman Lakhvi anema India-i kuli aika agüja liasü, ajisüaka tang tashi pa jenshia senzüdar.
Paisa, “26/11 (Mumbai amakba) sülen linük anapronglai aibelen aika inyakogo, ajisüaka  Pathankot tatalokba sülenbo item ama mataloktsü atema inyaker. Pathankot tatalokba sülen India, Pakistan ken o methinenbaji telemtetba tajung ka,” ta ashi.