Pathankot amakba dak sentakba nung nisung 3 puogo

Lahore/New Delhi, February 28 (Agencies): Kiralongrartemi Pathankot air base amakba ken o dak sentakba nung Pakistan nung temelung melemteti nisung asem pua lir aser court kati par asemprong anogo trok atema police nem agütsüogo.
Tai tonglokja alir asem – Khalid Mahmood, Irshadul Haque aser Muhammad Shoaib nungerji yashi ATC-2 judge, Bushra Zaman matsüngdangi anir ao. Gujranwala ya Punjab Province kübok Lahore nungi kilometer 70 shi pilar lir.
Iba sülen court-i par asemprong Counter-Terrorism Department (CTD) police nem anogo trok atema agütsü, ta osang ka ajanga ashi.
January 2, 2016 nü Pathankot nung Indian Air Force base amakba nung parnok densema lir, ta osang angazüker.
CTD-i par asemji Chand Da Qila bypass anasa para ki ka nung lia apu.
Pathankot amakba ken o dak sentakba nung tan ita tetenzüklen Gujranwala nung CTD-i mejangjaba nisungtem anema FIR benoka liasü.
FIR number 06/2016 ji Pakistan Penal Code kübok sections 302, 324 aser 109, iba den Anti-Terrorism Act kübok section 7 aser 21-I nung benoka liasü.
Par asemji kong apu’ar mejangjar, ajisüaka parnokji FIR mebenokdangsa apu südi ta bilemer.
January 2 nü kiralongrartemi Pathankot amakdang India nunger security sepai tenet tepset, aser iba ya Pakistan nung amenoka aliba telok, Jaish-e-Mohammad (JeM) züngsemtem südi ta India-i melung malemer.
Iba amakba sülen India-i Pakistan nem phone number kar densema kuli aika agüja liasü, aser item kuliji-a FIR nungji densema lir.