Pathankot amakba dak sentakba Pakistan nung kaketshir 3 puogo

New Delhi/Lahore, January 14 (Agencies): Pathankot amakba sülen India-i melung melemi bilemba phone number tem agütsüba nung ajemdaker tanü Pakistan nung kaketshir asem puogo, aser par asem densemabo iba ken o nung tang tashi nung nisung 31 puogo.

Tanü Pakistan nungi osang ka ajanga, “Agency temi Lahore University of Management Sciences (LUMS) nungi kaketshir ka tenüng agi Usman Sarwar, Sahiwal district institution nungi kaketshir Saad Mughal aser Karachi University nungi kaketshir Kashif Jan puogo,” ta ashi.

Osang ajanga angazükba agi, India ketdangsertemi agütsüba mobile number tem nung ajemdaker intelligence agency temi kaketshir asemji apu.

“Agency temi kaketshir asemji Jaish-e-Muhammad den tesentaktep ali asü mali’ar bushisüngdangdar,” ta ketdangser kati ashi.

Ajisüaka University of Management Sciences (LUMS) ketdangser Dr Yasir Hashmi-ibo, Usman Sarwar ji mapu ta shiogo.

“Tang Sarwar University nung lir,” ta pai ashi.

Item cell phone number temji Sarwar, Mughal aser Kashif nunger Facebook account den sentaktepa lir.

Mughal indang Facebook page nung Kashmir nung jihadist tem ama prangpong amer nisungtem noksatem lir aser India anema raratsü nangzükba noksa-a densema lir. Kashif-i Mughal ji pa den tongtepratepa inyaker rongnung züngoka lir aser osang balala prokba lir.

Tawa kiralongrartemi Punjab nung Pathankot airbase amakba dak sentakba ken o nung tang tashi nung Pakistan nung nisung 31 tashi puogo.

“Parnok ajakji province tesem balala nungi apu. Item tesem rongnung Bahwalpur (Maulan Masood Azhar aliba jila), Rahim Yar Khan, Gujranwala, Sialkot aser Lahore densema lir,” ta intelligence agency osang ajanga ashi.