Pathankot amakba ken o atema NIA-i Interpol dang teyari meshir

New Delhi, January 11 (Agencies) : Pathankot kiralongraba dak sendakba ken o bushisüngdangba nung National Investigation Agency (NIA)-i AK-47 magazine, binocular aser mobile phone ka kahtepba tesem nungi ngutetogo.
Ano, NIA ketdangsertemi Interpol dang Pathankot amakdang kahsetba kiralongrartem atema ‘black corner notice’ agütsütsü mepishiogo aser NIA ketdangsertemisa SP Salwinder Singh’er cook aser medemer dang asüngdangyatsü osang metetdaktsü.
January 2, 2016 anepdang züngia Pakistan nunger kiralongrar telok kati Punjab nung aliba Air Force base amak.
India-i iba mapa ya Jaish-e-Mohammed teloki inyak asütsü ta temulung melemi bilemer .
Iba mapa atema tetuyuba agütsür nisung pezü liasü ta India ketdangsertemi aitsüba rongnung Jaish-e-Mohammed tanishisang Maulana Masood Azhar aser tenu Abdul Rauf Asghar na dena lir.
Ano külen, Hombarnü media osang kar ajanga ashiba agi Pathankot kiralongraba mapa dak sendakba nung Pakistan-i India nem osang ka sangoktsüogo.
Kiralongrartemi amshiba number temji register süa mali aser ibaji mebushiteter ta Pakistan-i India dang ashia ta media osang ajanga metetdaktsü..
India nung Pathankot airbase amakba sülen Pakistan ketdangsertemi tesem balala mita ao aser nisung kar puogo, ta intelligence ketdangsertemi tanü ashi.
Parnoki ashiba agi, Gujranwala, Jhelum aser Bahawalpur district tem nung tesem kar mita ao aser nisung kar apu.
Pakistan ketdangsertemi pua alirtem jagi Pathankot amakba nung shilem agiba mesüra parnoki yaria inyakdaktsüba kulitem metettsü atema asüngdangya südar, ta osang ajangasa ashi.
Prime Minister Nawaz Sharif-i IB, Inter-Services Intelligence, Military Intelligence, Federal Investigation Agency aser Police ajak adenba Joint Investigation Team kati Pathankot tatalokba bushisüngdangtsü tuyuba sülen nisungtemji apu, ta ketdangsertemi ashir.
India-i Pakistan nem Pathankot amakertemi amshiba telephone number tem den tanga kulitem agütsüogo aser iba tasa atonga inyakdaktsürtem ozüng tapet agi merenshiang ta takhangba agütsüogo.