Pathankot amakba kuli India-i magütsütet: Pakistan

New Delhi, April 03 (Agencies): Pakistan nungi bushisüngdangtsü atema züngsem pongui akumba Joint Investigation Team (JIT) India-i arua Patkankot air base amakba küli bushisüngdangba sülen parnok Islamabad tonga ogo.
JIT telung osang nung ajemdaker Pakistan osangkakettem ajanga ashiba agi, Pakistan nungi kiralongrar teloki India, Pathankot nung airbase makogo, ta asütsüsa India-i kuli magütsütet, ta ashi.
‘The News International’ website ajanga ashiba agi, JIT-i kiralongrartemi amakba tesem nungjagi kuli kecha mangu, kechiyong mapangji kanga apettaka (minute 55) liasü.
Kasa osang ajanga, India nunger National Investigation Agency (NIA)-i parnok dang Border Security Force sepaitemi mapa majetba indang dang ashi.
JIT-i jembibaji India nunger ketdangsertemi ashiba den khenyongi balala. NIA-i sangdong densema kuli ajak- ballistic aser forensic osang, call records, Jaish-e-Mohammad tongti, Maulana Masood Azhar aser pa adianu Abdul Rauf na densema Pakistan nungi melung melemi aliba tenüngtem JIT den lemsatepogo.
NIA-isa, “Pakistan nunger ketdangseremi iba bushisüngdang ajanga temelung süa liasü aser tamaker pezüji par sensotem lir ta nangzükogo,” ta ashi.
Pakistan nungi prokba osang angashia NIA ketdangser kati osangbenertem dang, “Onoki parnok (JIT) nem osang ajak agütsüogo aser mongin yimya nung parnok den jembiba den külemi kuli ajak agütsüogo. Parnoki kechi jembidir aser inyakdir tangbo ibaji parnok melung,” ta ashi.
Hokolbarnü osangbenertem den jembidang NIA Director, General Sharad Kumar-i, “JIT den o lemtepji anatsülen nungi tangatetba nung latetba nung ajemdaker agia liasü,” ta metetdakja liasü.
Pakistan nungi JIT India-i arua anogo troknübuba (April 1) nung parnoki bushisüngdangba maparen tembanga liasü.
Ano iba ken o bushitsü atema NIA-ia Pakistan semdangtsü benoka JIT-i ibaji melungogo.