Pathankot amakba tenüng United Jihad Council-i agir

Srinagar, January 04 (Agencies): Tanü Hombar nü Pakistan-occupied Kashmir (PoK) nung amenoka aliba telungpur telok, United Jihad Council (UJC)-i parnok sasa Punjab nung Pathankot Airbase amakba tenüng agiogo.
Tawa kiralongrartemi Pathankot amakba mapang sepai tenet aser telungpur pongu tashi süogo.
Srinagar nung amenoka aliba wire service CNS, UJC otongdar, Syed Sadaqat Hussain-i, ‘Highway Squad’ den Kashmiri telungpurtemi airbase amak, ta ashi.
“Indian sorkar aser media Pakistan tetsübu ajanga timtemteper. Amakba ajungaji Pakistan nem tai tongloktsüba ajanga India-i taoba mapang nunga kodanga Kashmir nüjiso atema raraba nung teraksatsüba bener marutsütet, mesüra India-i o tamajung prokba ajanga tarutsü nunga kecha majangzüktettsü,” ta otongdari ashi.
UJC otongdarisa, Kashmir nung telungpurtemi tesüiba küm 27 tashi India sepaitem den rara-a arur aser Kashmir atema raraba raksatsütsü asoshi India-i aika inyaka arur,” ta ashi.
“Pathankot Air Base amakbaji ajanga Kashmiri Mujhadeen-i India dang, security tamentaktak aser garrison kecha telungpur tsüngdang nungi kümzüka mali ta osang agütsür,” ta otongdari ashi.
“Pakistan nem tai metongloktsüi India-i osangji metettsüla aser mapang amajok nung meintoki Kashmir nüburtemi parnoki tia latettsü atema maongka agütsütsüla,” ta kasa sangdong nungsa ashi.
UJC ya Lashkar-e-Toiba densema telungpur telok 13 shii akümba tentet ka lir.
Tesüiba anogo ana tashi Indian intelligence agency temibo Pathankot amakertem ya JeM lir, ta tai tonglokja arur.