Pathankot amakbaji ISI,Pak army ajanga lir: J&K Dy CM

Jammu, January 03 (Agencies): Tanü Deobar nü Jammu & Kashmir Deputy Chief Minister, Nirmal Singh-i, Panthankot nung aliba Air Force Base amakbaji Pakistan nunger intelligence agency, ISI aser par army tem ajanga lir, ta ashi.
“Tensa ajungaji ISI, (Pakistan) army aser separatist teloktemi aser par züngsemtemi raksatsü,” ta Singh-i osangbenertem dang ashi.
Taoba ita Ato kilonser Narendra Modi-i Pakistan semdanga liasü, ajisüaka yimjung maginer teloktemi iba tensa raksatsüogo, ta pai ashi.
“Kechi onük südir süaka ibaji ken o jembiba ajanga latettsüla. Ato kilonser Narendra Modi-i iba mera tulu agiogo, pa Afghanistan nungi meyipa aruba mapang (pa) Lahore-i oa Pakistan Ato kilonser Nawaz Sharif’er kidang kiyimba sentong nung aden.” ta paisa shisem.
“Ibaji ajanga osang ka agütsü, saka tensa ajakji ISI, army aser separatist teloktemi aser par züngsemtemi raksatsüogo,” ta pai ashi.
Centre sorkari iba tensa reprangshidagi aser linük nüburtem atema mera agitsü, ta pai ashi.
Security force temi mera agiba tenüngsanga Singh-i, kiralongrartemi amakdang asen sepaitemi shilem tajung agiogo, ta ashi.
“Yashi tatalokba mapang asen security force temi, army aser Punjab police-i junga inyakogo ta ni shiteter, security sepaitemi tensa azüoktetba mapang nisung asemi linük atema parnok taküm tenla agütsüogo,” ta pai ashi.
Paisa, iba tatalokba ajanga, Pakistan aser par agency tem dang India nung parnok sentong tamajung Indian security agency temi matalokdaktsütettsü ta osang agütsüogo, ta ashi.
“Iba mapa inyaker Pakistan nung aliba agency tem aser Pakistan na dang, yangi parnok mapa takok mangutsü ta sayutetogo,” ta pai ashi.