Pathankot lendong agütsür nisung trokprongla tepsetogo: Parrikar

New Delhi, January 05 (Agencies): Tawa Punjab kübok Pathankot Air Base amaker kiralongrar 6 prongla tepsetba osang India Defence Minister, Manohar Parrikar-i tanü Mongolbar nü metetdaktsüogo.
“Pathankot amaker kiralongrar 6 prongla tepsetogo saka lendong atalokdak aser temeket tesem kümzüka ayutsü nükjidong nung mitkartemi mitba maparen maneni teinyakdak lir,” ta pai sangoktsü.
Paisa ashiba agi, mitkartemi ghonda 28 tsüngda nung kiralongrar ajunga tepset aser parnok rongnung nisung anabo mejangjateti rongsar liasü.
Kiralongrartemi tan lendongji koma ataloktsü iba osang jangjatsü atema bushisüngdang maparena tenzüka aliba olen ka Parrikar-i tanü osangbener dang metetdaktsü.
“Tan lendong ataloktsür kiralongrartemi Pakistan nung yangluba prangpong-injang amshiba osang jangjaogo,” ta shia, Parrikar-i kiralongrar madak takok ngua raraba atema India mitkartem nema tenüngsang agüja liasü.
“Tan lendong nung pei taküm bendanga agütsür mitkar züngsem ajunga indang kinüngertem nem tapet senotsü teyari aser nüngdakba teyari agütsütsü nangzüker,” ta paisa shisem.
Ano külen, tan lendong nung asür ana – Honorary Captain Fateh Singh aser Havildar Kulwant Singh naprongla jalajabaso nem sen lakh 25 aser sorkar mapa agütsütsü tenangzükba olen ka Punjab Chief Minister, Parkash Singh Badal-i tanü metetdaktsüogo.
“Tan lendong nung pei linük asoshi taküm bendanga agütsür ajunga indang kinüngertem nungita yaritsü nangzüker,” ta paisa shisem.