Pathankot nung maneni kahteper; PM Modi-i senden ayongzüka agir

New Delhi/Washington, January 3 (Agencies): Air Force Station Pathankot nung Deobar aonung tashi maneni sepaitem aser kiralongrar tsüngda kahteper aser iba osang zülu tashi nung sepaitemi kiralongrar pezü tashi kahsetba osang jangjaogo.
Sepaitemi ghonda 30 tashi kiralongrartem anema mapa inyaka arudang sepai tenet taküm laluogo aser nisung 17 yirua lir.
Iba tesem nung operation maneni agidar aser kiralongrartem den kahtepdar, ta Air Commodore J S Dhamoon-i Deobar aonung osangbener dang ashi.
Air Commodore-isa ashiba agi, kiralongrar pezü kahsetogo aser sepaitem rongnung Garud ka, Defence Security Corps (DSC) pungu aser NSG kati parnok taküm bendanga agütsüogo.
Tanü anogo tepiyong helicopter anünglen yimzüa sepaitemi air force station nung kiralongrartem mita aoba nung yariogo.
Kiralongrar kar air base tesülen aliba arem ka nung sepaitemi longpanga lir aser iba tesem ajanga parnok aru, ta osang angazüker.
Anogo ananü Karnataka semdangba sülen taonung PM Narendra Modi-i New Delhi tonga aruba sülen kanga dang temaba jenjang nung senden ka ayongzüka agidar.
Iba senden nung PM-i NSA, Foreign Secretary aser tanga tongtipang ketdangsertem jaoka agir.
Pak Army & ISI-i iba tasa atonga inyak; US-i aitsür
Nawaz Sharif aser Narendra Modi tsüngda tesentaktep tajungba akümba asoshi tejashi nung Pakistan Army Chief Raheel Sharif-i Pakistan’er Inter-Services Intelligences (ISI) den yaritepa Pathankot amak ta osang ajanga ashi.
Pathankot Air Force base amaktsüba tasa ya Rawalpindi nung atong ta Zee TV ajanga metetdaktsü.
PM Modi-i yimjung olemtep tenzükba raksatsütsü aser linük ana tsüngda tesentaktep yanglushitsü atema tang teinyakdak mapa anendaktsütsü nükjidong nung iba tasa atonga inyak, ta osang ajanga ashi.
Ano, tawa Pakistan aser India tsüngda foreign secretary-level senden agitsü aliba thinendaktsütsü atema iba mapa inyak ta Zee TV osang ajangasa metetdaktsü.
Pakistan Army-i JeM kiralongrartem dang Jammu & Kashmir adena orr amaktsü tetuyuba agütsü aser kodang iba mapa inyakdir JeM-i tenüng agitsü atema parnok tsüngda jembitep, ta osang ajanga ashi.
Ano, United States-ia Indian air base amakbaji tesempatsü aketba kiralongraba inyakyim ka lir ta aitsüba osang metetdaktsüogo.
“Iba tesem nung aliba linük ajaki külemi kiralongraba mapa anema inyaktsü ayongzüker aser iba tesempatsü aketba mapa inyakertem temerenshi agüjang” ta State Department otongdar John Kirby-i sangdong ka nung metetdaktsü.

You must be logged in to post a comment Login