Patkai HSS Chümoukedima-i NBSE School Quartet Competition akok

Kohima, Rongjui/Sept. 27 (TYO): Nagaland Board of School Education (NBSE) küm tepiyong Golden Jubilee benjongmung nung shilem ka ama September 27, 2024 nü Capital Cultural Hall, Kohima nung mezüngbuba quartet singing competition ayongzüka liasü. Ibai district level competition nung takok angurtemi state level sentong nung shilem agiba alitsü.

Iba tetoktepba nung Patkai Higher Secondary School, Chümoukedima tenüng nung L. Zoningsen Longkumer, Kitiren Imsong, Zademo aser Romiso Lerüna nungeri shilem agia mezüngbuba jenjang nguteta liasü.

Tanabuba jenjang ya L. M. Higher Secondary School, Mhainamtsi tenüng nung Wisuliu, Meiningthuiliu, Karchile Pame aser Pougai Gangmei nungeri ngutet aser tasembuba jenjang ya Isaiah Ability Higher Secondary School, Wokha nungi Lansothong Lotha, Zuyani R. Humtsoe aser Meriyani Ngullie nunger temi nguteta liasü.

Iba sentong nung akhumdong ka ama taoba Chief Secretary aser Lokayukta Nagaland, Bano Z. Jamir-i moatsü aser takok angur nem lai sempet amokja liasü.

Lai iba sentong nung jembidang, Board-i kodanga Examination Result sangdongtsü lateta aliba anogo mesüyidaktsüi sangdonger, aser ibaji ajanga Board jenjang sayur, ta ashi.

State nung academic tsütsü tematiba nung küm 50 ajungba asoshi NBSE nem lai tenüngsang agütsü aser lanur takum melenshitsüsa sentong tasen yangluteta angazükdaktsütsü imlar, ta ashi.

Board lenmang shidak nung jajatar aser nenok jakdang aliba lenmang ya temoatsü asütsü imlar, ta ashi.

Nenok Golden Jubilee benjongmung tembangtsü asoshi renemtepba mapang tesüiba nung takok anguba atema pela tarutsü asoshi teimla tajung yur amungtsü imlatsür, ta Bano Z. Jamir-i ashi.

Laisa kaketshir tem dang tetoktepba nung shilem agitsü asoshi kodanga nungnanga malitsü ajungshi aser ibaji ajanga nenok tali ajangzüktsü, ta ashi.

Iba sentong nung jembidang, iba kenten sentong ya Board indang golden jubilee benjongmung nung shilem ka lir, saka ibai NEP 2020 den lirumedema art education, music aser danga yimya nung tanur anitettsü asoshi lir, ta NBSE chairperson Asano Sekhose-i ashi.

Music ajanga team, organization mesüra society züngsem rongnung tesendaktep bener arutsür aser teamwork temaba jenjang nung ajungketer, ta lai ashi.

NBSE-i music ya subject ka ama Class 9 nungi 12 tashi atema benoka lir aser NEP 2020 nunga tanur dak art education aser music ama sempet balala yangerdaktsütsü shia lir, ta lai ashi.

Asen sobaliba nung music ya shilem ka lir, aser alu nunga atener, ta lai ashi.

“Asenoki benjong-bentsü nung atenba kisüng masü saka alu nung mapa inyakdang, kidangi tsük bener adokdak, mo anetdang, nüngshilong abendang aser asen takum nung lenla ajak nung ken atener,” ta NBSE chairperson-i ashi.

“Asen akhi otsü nung ken ya kanga junga tera yanga lir. Yimjung aser rara, temeim aser ashioktsüba, heroism aser tasü aitba, maka-mait aser yimchi-yimjung, ajak nung ken yagi tongti shilem agir,” ta lai ashi.

Tetoktepba nung tetsüng ajemokdang jangratemtsüa lir, tayongzükba lir, ajisüaka yangji takoker aser tamakoker alir, saka aji tongtipang masü, saka shilem agiba ya tongtipang lir, ta Sekhose-i ashi.

Nagaland nung sempet tajung aketer jenti lir, aser sempet tajung amshiba nung tajangzük lir, tepela angur aser career lir, ta lai ashi.

Laisa district level competition takok ngua ayongzükba atema All Nagaland Private School Association (ANPSA) aser district units, aser district nung DEOs/Sr.SDEOs tem nem tenüngsang agüja liasü.

Iba sentong nung ANPSA (Central), Nagaland, Nini Sekhose-ia o tatsüka jembidang, küm shia Board ajanga merit list aser rankings adoktsüba ajanga private aser government school tem nung kaketshirtem tali ajungmesor, ta ashi

Board staff temi pei mapa nung bendanga agütsür inyakba asoshi lai tenüngsang agütsü aser Board küm 50 alizüng tongtetba atema tenüngsang agüja liasü.

Iba quartet competition nung tetendanger tem ya Ajeen Longchari Sucha, Vocal Coach; Zareni Yanthan, Music Director Kohima Lotha Baptist Church; Vesato Theluo, Managing Director, Nagaland College of Music & Fine Arts; James Shikiye Swu Music Director, Sumi Baptist Church Kohima and Vimezo Iralu Worship Director Union Baptist Church Kohima nungertem liasü.

Sentong tenzüka Pastor, Kohima Ao Baptist Arogo, Sakurepba Tzudir-i sarasadem, NBSE secretary Rangumbuing Nsarangbe-i iba tetoktepba indang osang tongmelang agi agütsü, Rev Dr Neiliezhü Üsou Memorial School Kohima, Little Star Higher Secondary School Dimapur, Keneisenuo Sorhie & Moko Koza nungeri temeja ken tena liasü.