Paul McCartney nem kensep copy timba ayoker tenüng agütsüogo

London, July 23, 2016 : British chart history nung nüngtugu kentener telok Beatles nungi Paul McCartney nem ‘most successful album artist’ tenüng agütsüogo.
Alima ajunga nung McCartney indang kenseptem, copy million 700 tashi yoktetba ajanga pa nem ‘Official Chart Record Breaker Award’ agütsü. Iba award anguba sülen pa Britain nung kensep copy timtiba yoktetsang kümogo, ta Telegraph.co.uk osang ajanga metetdaktsü.
1963 küm parnok teloki mezüngsüa adokba “Please please me” kensep chart nung number 1 aküm aser kentener balalai mezüngsüa adokba kensep rongnung iba kensep ya mapang talangtiba, hopta 30 tashi, temaba jenjang nung masetshi aliba ajanga ‘chart history’ tasen yanglu. Arishi küm 74 tain, McCartney meyong kensep tesüsa chart number one-i aibaji 2000 küm adokba ‘The Beatles’s compilation’ kensep lir.
Official Charts Company dang pai, “Iba sempet anguba ya mamangtettsü ka lir kechiba süra asenoki züluba kenji tangari junga agir asü magirar aseni mezüngdanger,” ta ashi.
“‘Please, please me’ temaba jenjangi atuba ni bilemteter, ibaji onoki indang kensep mezüngbuba liasü. Ano tang aoksaa iba sempet anguba ya koda jangratemtsüka! Anungji nüburtemi ni iba sempet angutsüsa temsüa kümdaktsüba asoshi kanga pelar. Ni nenok ajak meimer. Iba den külemi kü kensep alirtem dang kanga pelar,” ta pai ashi.