Paul Pogba December matong tashi masayatettsü

Mongputeni/October 28, 2019 (Agencies): Manchester United midfielder Paul Pogba, tetsüng yiruba ajanga December matong tashi masayatettsü, ta manager Ole Gunnar Solskjaer-i shiogo. France nunger international asayar Pogba, United nungi tatemsa September ita 30 nung Arsenal den goal 1-1 agi draw asüba asaya nung shilem agia liasü. “December matong tashibo Paul asayatsü imlaa matar. Pa mapang tatsükabo masayatettsü,” ta Deobarnü Norwich City goal 3-1 agi akokba sülen osangbenertem den sensaksemba mapang Solskjaer-i ashi.
“Pa tetsüng yiru aliba tajungba akümtsü asoshi mapang agitsü. Pa international break sülen Sheffield United den asayatsü aliba nungiang asayatettsü akok, saka December matong tashibo asenoki pa mangutsü.
“Ni doctor masü saka yiruyipong ka anemptsü mapang agir,” ta pai ashi.
Solskjaer-i ashiba agi Pogba, Manchester United pur taruba asaya pezü tashi nung masayatettsü aser Sheffield United pur den parnok asayatsü aliba ya November 24 ang lir.
United nungi asayartem rongnung ano Luke Shaw, Eric Bailly, Diogo Dalot aser Nemanja Matic nunger yirur lir. Kasa mapang nung Anthony Martial August ita nungi masayai aliba meyipa aruru mezüngbuba Norwich den asayaogo.
Norwich akokba sülen United pur jenjang tenet bubai atuogo aser parnok Bodhbarnü League Cup nung Chelsea den asayatsü.