Paul Walker’er jalai pa asoba anogo mung nung foundation ka tenzükogo

September 13, 2015: Asür Paul Walker asoba anogomung 42 buba nüngtem nung par jala Meadow-i pa tenüng nung foundation ka tenzükogo, iba foundation ajanga arem shiruru aser tzü shiruru kümzüka ayutsü atema inyaktsü.
Walker-i “Fast and Furious” nung Brian O’ Conner shilem agia liasü.
Par jala arishi küm 16 Meadow-i tebu dena tangokba noksa ka densema lai Paul Walker Foundation tenzükogo ta sangdong.
Iba Foundation ajangasa Marine science kaketshirtem aser research agirtem nema senotsü teyari aser scholarship agütsütsü.
“Kübu bilemteta, pai jangrabatem ni bilemteter. Pai tzüyim meimba, shiruru kümzüktsü jangraba, nisungtem yaritsü jangraba aser temeim mapa sayutsü jangraba ni bilemteter,” ta lar jala Meadow-i ashi.
“Ni pai jangrabatem alima den lemsatepnnüba ajanga ni iba foundation tenzükner. Ni pa indangji tangar den lemsatepner” ta lai Instagram post ajanga ashi.
“Fast and Furious” nung Walker den külem shilem agirtem Dwayne Johnson, Ludacris aser Nathalie Emmanuel nungeria pa asoba anogomung nung asür nem akhüm agütsüogo.
“Tasoba anogo salem @RealPaulWalker #Na yangi lir-a ta südaktsünüali,” ta Nathalie Emmanuel-i lemsatep.
WWE wrestler nungi actor akümsang Dwayne Johnson-ia Twitter ajanga, “Tasoba anogomung salem adianu. Na asoba atema pelar. #Ohana #PaulWalkerFoundation #DoGood.” ta ashi.
“Kü adianu, tasoba anogo salem @paulwalker #oadokogo saka mamateter,” ta Ludacris-ia Instagram ajanga lemsatep.
Paul Walker-i “Fast & Furious ” dak alia “Eight Below”, “Timeline”, “Into the Blue”, “Joy Ride” aser “Running Scared” film tem nunga shilem agiogo.
Paul Walker ya November 30, 2013 nü gari tsükokba lendong nung asü.