Pawan Hans nung asüsang Col MS Brar tasümang remogo

Chandigarh, August 15 (Agencies): Helicopter lendong nung asüsang Colonel, Brar asüpila sentong nung defence officer aika dena liasü. Iba sentong nung Brigadier RS Yadav aser Air Commodore SK Indoria nati tesüiba mapang Army Aviation Corps pilot, asür Brar nem akhüm agütsüba temaitsü tasümang süngden nung naro yuja liasü.
“Kanga dang tia makai pa iba ama lendong ka nung alima nungi pilago. Pa ya pilot onsara tajung ka liasü,” ta Panchkula nungi tesüiba mapang Air Commodore aser arishi küm 48 pilot tasüsang tebu, BS Brar-i ashi.
Col Brar ya mapang metongjungi 2010 küm army nungi anisüngzüka liasü aser Tirap Deputy Commissioner Kamlesh Kumar Joshi dena mena aliba Pawan Hans helicopter ya pai ania liasü. August 4 anepdang 10:45 ako meta state meyong Pawan Hans helicopter ji Tirap district, Khonsa nungi apusoa liasü.
August 04, 2015 nü Arunachal Pradesh, Tirap district nung Pawan Hans helicopter samaba sülen anogo ti buba nung High Altitude Warfare School (HAWS) nungi commando temi helicopter nung mena alir Tirap Deputy Commissioner Kamlesh Kumar Joshi, pilot ana- MS Brar aser Rajeev Hoskote nunger tasümangji Tirap district nung nguogo.
Iba helicopter nungjisa Longding aser Changlang Deputy Commissioner na anioksemer New Delhi-i oa August 6, 2015 nü tongtibang senden ka nung adentsü sentong liasü.
Col Brar tasümang ya Hokolbar nü Panchkula-i bener oa liasü.
Defence force nungi anisüngzükba sülen Col Brar-i Pawan Hans Limited nung inyaktsü tenzük. Pai iba mapa nung amtakli Guwahati, Itanagar aser Panchkula tsüngda jajaba helicopter anishia liasü.
Pa iba lendong ya ataloktsü anogo ishika tejakdang Panchkula, Sector-20-i meyipba aotsü sentong liasü saka ano hopta ana tali atsünglangtsüba ajanga moi lia iba lendong atalok.