Paytm ajanga Jan. 15 nung Wallet Business ajak Payment Bank-i transfer asütsü

January 11, 2017 (Agencies): Digital payment amshir telok Paytm ajanga wallet business ajak payment bank-i transfer asütsü, ta osang metetdaktsüba ajanga mobile wallet ajak January 15 sülen nungi mapa meinyaktsü ta ololu social media nung prokshiba ajak anentsü.
“January 15 sülen nungi Paytm Wallet mamshitettsü ta olulu lir, saka ochi ji ya lir, Paytm Wallet amshirtemi Paytm Payment Bank Account ajanga tajangzük tali angutsü,” ta Paytm ajanga metetdaktsü.
January 15 tashi nung Paytm ya payment bank-i melentsü aliba ajanga Paytm wallet nung sen aliba mamshitettsü, ta tiyazü osang ka prokshia lir.
Paytm Wallet ya yakta Paytm Payment Bank-i transfer asütsü saka m-wallet ajanga January 15 sülena mapa inyaktsü, ta company ajangasa metetdaktsü.
Item wallet indang kibur ya company tasenba Paytm Payment bank Ltd dangi melenba sülen bank ajanga iba sentong tenzüktsü aser customer nem bank account tasen lapoktsü asoshi option agütsütsü, ta Paytm-isa shisem.
“Paytm payment bank nung wallet amshitsü asoshi account tasen lapoktsü menüngdaktsü,” ta parnokisa ashi.
“Iba temelenshi aruba sülen customer nem service aser features tasen agütsütsü aser item ajanga saving account amshia sen interest nung yutettsü aser tang anguba service ajak kasa angutsü,” ta Paytm otongtar kati metetdaktsü.
Customer temi iba Paytm Wallet mamshinüra care@paytm.com tangi email yoktsü mesüra Paytm.com/care nung log in sür iba osang metetdaktsütsü aser account nung aliba senji pei indang bank account nung one-time transfer sütsütsü.
Paytm amshirtemi tesüiba ita trok tashi zero balance aser mamshi lira, iba account Paytm Payment Bank Wallet-i transfer masütsü saka Paytm app log in asüdang iba kasa account transfer asütsü asoshi maongka agütsütsü.