Paytm ajanga ‘Payments Bank’ lapoktsü

New Delhi, January 05 (Agencies): Paytm amshia sen monoktsü asoshi ‘Payments Bank’ lapoktsü sentong tasen tenzüktsü atema inyaktepa aruba maparen tembanga arua Mongulbarnü Reserve Bank of India (RBI) ajanga temelaba agütsüogo, aser iba sentong taruba ita nungi tenzüktsü imlar, ta Paytm sangdong ka ajanga metetdaktsü.
Bank nung account lapoka alir shia-i Paytm amshia ‘Payments Bank’ nung sen lakh 1 tashi inoktsütettsü. “Tanü RBI ajanga Paytm Payments Bank amenoktsü temelaba agütsüogo. Iba sentong nübur tangi bener arutsütsü onoki matateter,” ta One97 Communications tenzüksang, Vijay Shekhar Sharma-i ashi.
“Paytm Payments Bank nung tongti shilem agia inyaktsü asoshi maongka anguba ama tanga shilem kecha mali, aser iba mapa nung ni ‘full-time executive’ asütsü,” ta Sharma-i ashi.
India linük nung tajemzük tia nung aliba nübur million aika nem iba Paytm Payments Bank ajanga ‘banking industry’ nung senotsü amshiyim aser shishilembaba sabang tasen ka lapoktsütsü mechi iba sentong tenzük, ta paisa shisem.
Iba Paytm Payments Bank mezüngbubaji Uttar Pradesh Noida tesem nung taruba ita nungi tenzüktsü imlar, ta Paytm otongtar ajanga osangbener tang ashi.
Iba sentong taoba küm Diwali mapang nungi tenzüktsü liasü. One97 Communications tenzüksang Vijay Shekhar Sharma aser tangar nisung 10 nem iba Payments Bank tenzüka aotsü asoshi sorkar-i temelaba aguja lir.
Senotsü ketdangsüba tsütsü tali tajungba akümtsü asoshi SFBs (small finance bank) aser PBs (payments bank) tenzüktsü asoshi telok 21 nem taoba küm temelaba aguja liasü. Saka Tech Mahindra, Cholamandalam Investment & Finance Company aser Dilip Shanghvi telok, IDFC Bank aser Telenor Financial Services nungertemi iba maparen toktsü.
Payments Bank ya tangbo Airtel-i tang amshirdar. Aditya Birla Idea Payments Bank-i iba sentong 2017 küm tom nungi tenzüktsü imlar.
Paytm Payments Bank nung shilem tulubaji Sharma meyong lir aser tanüngba shilemji One97 Communications meyong lir.
Alibaba Group aser Ant Financial ajanga taoba küm One97 Communication nem sen USD 680 million tajangzük bener arutsü, aser ibaji ajanga Paytm nung par teloki shilem 40 agia lir.