PB Acharya Angh menden nungi anentsütsüla: Assam Congress

Guwahati, November 26 (Agencies): Assam nung tentetba Congress yimtenren teloki Nagaland aser Assam Angh, PB Acharya yimsüsütsü menden nungi anentsütsü takhangba ka India sorkar nem agütsüogo.
“Hindustan ya Hindu nunger meyong,” ta Acharya-i tashishitsü aketba olen ka sangoktsüba ken o nung ajemdaker Assam Chief Minister, Tarun Gogoi-i Acharya yimsüsütsü menden nungi anentsü takhangba benoker anogo ishika lir külen Congress telokia tan par takhangba benokogo.
“India sorkari ita ka tsüngda nung Acharya yimsüsüba menden nungi manentsüra onoki anogoshia Raj Bhavan kima lungkak aittsü renema lir,” ta Assam Pradesh Congress Committee (APCC) Tir, Anjan Dutta-i tanü metetdaktsü.
Acharya anemer ta sayutsü nükjidong nung Congress züngsem 10,000 shi asüng, Hokolbar nüa Guwahati nung lungkak aittsü sentong aliba osang ka pai sangoktsü.
Ano külen, “Alima tesem balala nung timtem toushi ajurur Hindu nungertem India-ia aru alitsü temeten lir aser parnok agizüktsüji India nüburtem teinyaktsü,” ta shia Acharya-ia pa metentsü olen ka metetdaktsüogo.