PB Acharya aser SC Jamir nati asür Chenlom Phom mang ayimer

Dimapur, Metsüremi (March) 14 (TYO): Metsüremi (March) 12, 2018 nü lennir tejen Chenlom Phom asüba atema temulung raksar ta Nagaland Governor, PB Acharya-i sangdong ka nung metetdaktsü.
Asür kinungtsü Smt Chubasenla Chenlom Chenth dangi züluba shidi ka nung, Governor Acharya-i “Asür Chenlom Phom-i Nagaland nung alirtem ajungkettsü atema mapa balala inyak aser pa teti bilemtettsü” ta shia lir.
Pa ya medemer tajung ka liasü, teti sasapela liasü aser lanuputu meimba lennir ka liasü. Pa asübaji nisung aika atema takoksa lir aser pa kodanga mamatsü, ta Acharya-isa ashi.
Paisa, asür kinunger ajak den asükhu lemsatep aser Tulusangi parnok nem tashi aser tesünep agüjang ta sarasademtsüba metetdaktsü.
Asür Chenlom Phom ya 1977 küm mezüng Member of Legislative Assembly inyak aser iba sülen 2008 tashi kümsük pungu MLA inyak. Pai MLA, Deputy Speaker, Speaker, Minister aser Advisor mapatem inyaka liasü, ta Governor-isa shidi nung shia lir.
Taoba Nagaland Legislative Assembly Speaker, Chenlom Phom asüba osang angashia ni aser kü kinungtsü kanga aoksar ta SC Jamir-i sangdong ka nung metetdaktsü.
Mapang tamajungdang küna külemi sorkar tenzükba wadang nung inyak aser ni pa kanga junga meteta lir. Asür Chenlom ya kanga dang tenendak aser bendanga agütsüba lennir ka lir aser pai tarendaktsü kecha melii dang pa tebilembatem lemsatep. Pai Phom nunger kanga dang meim aser parnok ajungkettsü atema shilem tulu agi, ta SC Jamir-isa ashi.
Pa asübaji Naga nunger atema yimten yimsüsür tajung ka akoksaba lir aser talisa Phom nunger atema takoksa ulura lir. Kü kinungtsü künati tasür kibong den asükhu lemsateper aser pa tanüla teti anisüngzük ngudakjangma ta sarasademtsür, ta paisa shisem.

You must be logged in to post a comment Login