Pb. Acharya aser T.R Zeliang nati asür Kalikho Pul mang ayimer

Dimapur, August 9 (TYO) : August 9, 2016 taoba Arunachal Pradesh Chief Minister, Kalikho Pul asüba osang angashia kanga aoksar ta Assam Angh, P.B. Acharya-i sangdong ka nung metetdaktsü.
Angh Acharya-i sangdong ka nung, “Kalikho Pul asüba osang angashia kanga aoksar. Iba osang mamangteter kechiyong pa lanur ka aser sempet aika keta aliba lennir ka liasü. Linük aser talisa Arunachal Pradesh atema lennir tajung aser bendanga agüja inyakba nisung ka akoksaogo” ta metetdaktsü.
“Tsüngremi asür anisüngzükdakjang aser par kibong nem tashi aser tesünep moajang ta sarasademtsür” ta Acharya-isa shisem.
Nagaland Chief Minister, T.R Zeliang-ia sangdong ka nung taoba Arunachal Pradesh Chief Minister, Kalikho Pul asüba atema aoksaba osang metetdaktsü.
“Arunachal nung Chief Minister inyakdang ni pa den ajurutepa sensaksem aser iba mapang pai Arunachal state melenshitsü atema alizüng aser tejangraba aliba ni pa dak ajitet” ta T.R. Zeliang-i sangdong ka nung metetdaktsü.
“Taoba Assam Assembly elections nunga küna külemi BJP atema nüboyimba sentongtem nung shilem agi aser election anogo jakdang küna külemi Prime Minister dena sabang ka nung shilem agi. Asür Pul-i Assamese kanga junga shia liasü aser pai Assam nunger den kanga junga jembi” ta sangdong nungsa shia lir.
“July 13, 2016 nü Guwahati nung National BJP President, Amit Shah-i North East Democratic Alliance (NEDA) tenzüktsüba sentong nunga küna külemi liasü aser iba sentong tenzüktsü minute ishika lia, Supreme Court-i Arunachal Pradesh nung Congress sorkar tanaben tentettsü oshidang agütsü. Iba osang angashiba sülen asür Pul ni anasa arua amen aser idangji ni pa dang temulung ila mebilemtsü atema mesüzük. Ajisüaka, ibaji ni pa tatemsabuba ajuruba anogo liasü”  ta T.R Zeliang-isa shisem.
Pa asüba ajanga Arunachal Pradesh atema dang masü saka Northeast ajunga atema lanur lennir tajung ka akoksaogo. Nagaland sorkar aser nübortem ajak tenüng nung ni asür kibong aser Arunachal Pradesh nunger ajak den asüku lemsateper, ta paisa metetdaktsü.