PB Acharya aser TR Zeliang nati Diwali salem metetdaktsür

Dimapur, October 18 (TYO): Nagaland Governor, P.B. Acharya aser pa kinungtsü Kavita Acharya nati Diwali benjung tenüng nung Nagaland nung alirtem den tepela salem metetdaktsü.
“Diwali ya tesangwa indang benjung lir aser iba ajanga asenok ammang nungi tesangwa leni aotsü ajungmesor. Asenoki aria bilemba, temeim aser yimya tajung indang milentem tsüklokdi. Asenoki azüngtsü-zülutsü memetetba, tebendang, sensaktia aser tesempatep anema raratsü bangzüngdi aser alima nung yimjung ajungketdi,” ta PB Acharya-i sangdong ka nung metetdaktsü.
Prime Minister, Narendra Modi lenisüba kübok azükaru, tashi tait aser telemsa maliba New India ka yangerba mapa nung shilem agidi, ta paisa ayongzük.
Ano, Nagaland chief minister, TR Zeliang-ia Nagaland sorkar tenüng nung nisung ajak dangi Diwali salem abener ta metetdaktsü.
India ya temeyoktep linük ka lir aser tamangba yimsü aser sobaliba balala ajak akhümtsübur. Iba tesangwa indang benjung ajanga asenoki kati ka dang temeim sayudi aser akhümtsübutepdi. Iba anogomung ajanga Nagaland nung alir shia dangi yimjung, tepela aser azükaru bener arujang ta moatsür, ta TR Zeliang-i sangdong ka nung ashi.
Nagaland Governor aser Chief Minister naprongi Diwali amungdang mopung memenentsü mepishia metetdaktsüogo.