PB Acharya-i Ametchong yimtsüng lapoktsü

Dimapur, December 19 (TYO): Nagaland Governor, PB Acharya-i December 18, 2017 nü Longleng district kübok Ametchong yimtsüng lapoktsü.
Nagaland nung ali rongsen jenti moaja lir aser tetemjen nübo agüja lir. Anungji Nagaland ya takar state ka akümtsü akok. Ametchong nung alirtemi meranga inyaktsüla aser pei sasa züsenteta alitsü ayongzüker, ta Acharya-i o jembidang ashi.
Paisa, Centre sorkari inyakba Look East Policy indang osang lemsatepdang, “iba mapatong ya North Eastern State tem aser Nagaland-i pelashishia agizüktsüla aser maongkatem agitsüla” ta ashi.
Acharya-isa lanurtem dang skill development degrees aser courses agitsü aser mapa bushirtem masü saka mapa agütsürtem asütsü ayongzük.
Iba tangatetba ajanga Nagaland ya tajungba melenshitsü, ta paisa shisem.
Sentong nung Ametchong Adhoc Village Council Adhoc Chairman, B. Kengshing-i Ametchong indang osang tatsü agi metetdaktsü, L. Shaupen Phom-i tesentepertem pela agizük Longleng DC, John Tsulise Sangtem, Ex Minister, B. Pongshak Phome nungertemi o tatsütsü jembi, Ametchong Students’ Union-i ken ka aten aser Deputy Secretary, Government of Nagaland, B. Henok Buchem-i anküp tepela o jembi.