PB Acharya-i Assisi School aser City College semdang

Dimapur, October 3 (TYO) : Tanü shisaluyimba maparen ya pei atema bilemba mapa ka kümogo aser nisung ajaki sen talila aazüktsü lenmang dang bushiba ajanga India-i tangar memeneper, ta Nagaland aser Assam Angh, PB Acharya-i ashi.

Honibarnü Assisi Higher Secondary School, Dimapur nung Parents’ Day sentong nung jembidang Acharya-i ashiba agi, linük ka azükarua aotsübaji shisaluyimba dak keta lir aser Nagaland azükarudaktsünüra nisung ajaki lokti ajungkettsü atema inyaktsüla.

Acharya-isa Nagaland state sorkar indang inyakyim aija ashiba agi, medical seat entrance examination nung non local candidate ka menden 7 buba nung takok angu saka iba ya atema ashishitep ken o tulu ka adokogo.

Nagaland nung power supply junga manguba atema Acharya-isa ashiba agi, Nagaland state nung power peria ngutettsü lenmang lir saka nisung kari sen talila aginüdang state ajunga timtemdaktsür.

Assisi Higher Secondary School, Dimapur nung kaketshir 1,704 azünger saka metsümeshidakbo 12 dang lir ta angazükba sülen Angh-i school kidang metsümeshidak talila pezü yanglutsütsü ta tanü nangzük.

Assisi School nung shilem agiba sülen Angh Acharya-i Netaji colony nung aliba City College of Arts & Commerce nung 23 buba Fresher’s meet nung aden.

City College nung o jembidang, linük nung University temi lokti indang khurettem atema mebilemer aser iba jagi zünger mapa manguba khuret tuluba kümdaktsür, ta Acharya-i ashi.

Skills ya kanga tongtipang aser shirnok dak skill lir parnokji lokti atema rongsen lir. Iba dak sendakba nung Centre-i graduating students indang 6th semester ji skill driven asütsüla ta telemtetba agiogo aser sorkari iba asoshi skills 150 shi shimogo, ta Acharya-isa metetdaktsü.