PB Acharya-i Dimapur district ketdangsertem den ajurutep

Dimapur DC indang Conference hall nung Nagaland Governor P.B Acharya-i Dimapur district ketdangsertem den senden ka amendang agiba noksa angur.

Dimapur, Chiteni (July) 2 (TYO): Chiteni 2, 2018 nü Nagaland Governor PB Acharya-i D.C indang Conference hall Dimapur nung sorkar department balala nungi Dimapur District ketdangsertem den ajurutepa senden amen.
Sorkari inyakba scheme tem ya sensakertem ajungkettsü aser tangar memenepertem yaritsü atema inyaker. Anungji sorkar ketdangsertemi item scheme tem nüngdakbapurtem atongtsüsa inyaktsü ayongzüker, ta Acharya-i senden nung ashi.
Governor-isa district nung ketdangsertem dang sorkari mapa tajungba inyaka aotsü atema tebilembatem lemsateptsü atema mepishi.
Sorkar school temi result tajung manguba atema Acharya-i ashiba agi, sensakertem rongnung sensaktibapurtemi sorkar school nung azünger, anungji asenoki parnok jenjang tajungba kümdaktsütsüla.
Dimapur district nung law & order tensa atema asüngdangdang, Commissioner of Police-i “Dimapur nung law & order junga lir” ta langzü.
Paisa Dimapur district nung ozüng alema inyakba ken o tem benokba aser tang tashi nung mapa inyaka aruba osang Governor dang ashi.
Nagaland ya topur tajung state ka lir aser ali rongsen jenti moaja lir. Anungji, rongsenkettsüng tsütsü Nagaland jenjang tajungba kümdaktsütsü atema nübortemi meranga inyaktsüla, ta Governor Acharya-i ayongzük.
Senden nung mendenji Dimapur Deputy Commissioner, Sushil Kumar Patel liasü aser paisa tesentepertem pela agizük.
Governor-i Dimapur district atema tebilemtsü bena semdangba atema Patel-i pelaba metetdaktsü.