PB Acharya-i Northeast terenlok atema inyaktsü ashi

Guwahati, July 08 (Agencies) : Assam aser Nagaland Angh, tetssüshi P.B. Acharya-i Mumbai nung aliba North East nüburtem dang North East tesem terenlok atema amalitepa inyaktsü mepishia ashi.
Acharya-i northeast nung teinyaktettsü aika lir aser itemji mapa küma inyaktsü atema nüngdakba inyakyim amshia linük nung terenlok agütsütsüla ta ashi.
July 6, 2016 nü Mumbai nung pa nem tetusshi agütsüba sentong ka nung jembiba mapang pai, tesentepertem dang India nung North East State tem terenlok atema kanga meranga inyaktsü nüngdak, ta ashi.
Assam Bhawan Mumbai (Govt. of Assam), Indian National Fellowship Centre(INFC), Assam Association Mumbai, Naga Students Union Mumbai aser Shreemoyee Asomiya Mahila Samiti Mumbai teloktemi Swatantryaveer Savarkar Rashtriya Smarak Auditorium, Shivaji Park, Dadar(W) Mumbai nung Acharya nem tenungsang agüja liasü.
Iba sentong Mumbai University nung Vice Chancellor Dr. Sanjay Deshmukh-i ketdang asü aser sentong nung Mumbai nung alir tongtibang nisung aika aden.
North East Zonal Cultural Centre (NEZCC) aser Assam Association Mumbai teloktemia sobaliba shilem kar agi.
Acharya telok den sensaksem ka nung dena Assam aser Nagaland na tsüngda tesentaktep tsütsü parnoki metetnüa asüngdangba kar langzü.